கணவன் மனைவியான விராட் - அனுஷ்கா: திருமணம் முடிந்தது!

விராட் கோலி, அனுஷ்கா சர்மாவின் திருமணம் இத்தாலியில் உள்ள மிலன் நகரில் நடந்து முடிந்ததாக தகவல் வெளியாகியுள்ளது.

இந்திய கிரிக்கெட் அணியின் கேப்டன் விராட் கோலிக்கும், பாலிவுட் நடிகை அனுஷ்கா சர்மாவுக்கும் இத்தாலியில் உள்ள மிலன் நகரில் உள்ள தனியார் ரிசார்ட்டில் திருமணம் நடந்து முடிந்ததாக ஃப்ளிம்ஃபேர் பத்திரிக்கை கூறியுள்ளது. இந்த திருமண நிகழ்ச்சியில், மிக நெருங்கிய குடும்பத்தினரும், நண்பர்களும் மட்டும் கலந்து கொண்டதாகவும் அப்பத்திரிக்கை தெரிவித்துள்ளது. மேலும் இன்று இரவு 8:00 மணிக்கு விராட், அனுஷ்கா இருவரும் திருமணம் குறித்து அதிகாரப்பூர்வமாக அறிவிப்பார்கள் என்றும் ஃப்ளிம்ஃபேர் கூறியுள்ளது.

கோலியும், அனுஷ்காவும் 2013 ஆம் ஆண்டு முதல் காதலித்து வருகின்றனர். விராட் கோலி வெளிநாடுகளுக்கு விளையாட செல்லும் போதெல்லாம் அனுஷ்காவை அழைத்துச் செல்வார். இந்தியாவிலும் பல்வேறு நிகழ்ச்சிகளில் இருவரும் ஒன்றாக கலந்து கொண்டு வருகின்றனர். இடையில் 2015 ஆம் ஆண்டு சிறிது காலம் பிரிந்து இருந்தாலும் மீண்டும் காதல் அவர்களை இணைத்தது. இந்நிலையில் இன்று அவர்கள் இருவரும் இத்தாலியில் திருமணம் செய்துகொண்டதாக தெரியவந்துள்ளது.