புள்ளி மானை வேட்டையாடியவர்களுக்கு ரூ.5 லட்சம் அபராதம்

ஈரோடு மாவட்டம் பண்ணாரி வனப்பகுதியில் மான் வேட்டையாடிய 4 பேருக்கு 5 லட்சம் ரூபாய் அபராதம் விதிக்கப்பட்டது.

ஈரோடு மாவட்டம் பவானிசாகர் வனச்சரகத்திற்குட்பட்ட பண்ணாரி வனப்பகுதியில், சிலர் மான் வேட்டையில் ஈடுபட்டுள்ளதாக பவானிசாகர் வனத்துறையினருக்கு தகவல் கிடைத்தது. இதையடுத்து அங்கு ரோந்து சென்ற வனத்துறையினர் வேட்டையில் ஈடுபட்டிருந்த நால்வரையும் மடக்கிப் பிடித்தனர். அவர்களது காரை சோதனையிட்ட போது அதில் புள்ளி மானை வேட்டையாடி வைத்திருந்தது தெரிய வந்தது.

இதன் தொடர்ச்சியாக, மானின் உடலையும் அதை‌ வேட்டையாடப் பயன்படுத்திய இரட்டைக்குழல் துப்பாக்கியையும் வனத்துறையினர் பறிமுதல் செய்தனர். வேட்டையாடலில் ஈடுபட்ட பூபதி, கார்த்திக், சதாசிலம், ஸ்ரீதரன் ஆகியோர் கைது செய்யப்பட்டனர். நால்வரையும் மாவட்ட வனஅலுவலர் அருண்லால் முன்னிலையில் ஆஜர்படுத்தியதில், தலா ஒன்றே கால் லட்சம் வீதம் மொத்தம் 5 லட்சம் ரூபாய் அபராதம் வசூலிக்கப்பட்டது.