வேலூர்: ரயில்வே மேம்பால விரிசலை சரிசெய்யும் பணி தீவிரம்

வேலூர் மாவட்டம் பொன்னை ஆற்றின் குறுக்கே உள்ள ரயில்வே பாலத்தில் ஏற்பட்ட விரிசலை சரி செய்யும் பணி நடைபெற்று வரும் நிலையில் மேலும் 2 தூண்களில் மண் அரிப்பு ஏற்பட்டிருப்பது கண்டறியப்பட்டுள்ளது.

திருவலம் அருகே பொன்னை ஆற்றின் குறுக்கே கட்டப்பட்ட ரயில்வே பாலத்தின் 38 மற்றும் 39 ஆவது தூண்களில் விரிசல் ஏற்பட்டது கண்டறியப்பட்டதை அடுத்து, ரயில் போக்குவரத்து நிறுத்தப்பட்டு, சீரமைப்பு பணிகள் நடைபெற்று வருகின்றன. கடந்த இரு தினங்களாக 20-க்கும் மேற்பட்ட ரயில்கள் ரத்து செய்யப்பட்டு போர்கால அடிப்படையில் தூண்களுக்கு கீழ் கான்கிரீட் சிமெண்ட் பூச்சு பணிகள் நடைபெற்று வருகின்றன.

இந்நிலையில், விரிசல் ஏற்பட்டுள்ள 38 மற்றும் 39 ஆவது தூண்களுக்கு அருகில் உள்ள மேலும் இரு தூண்களில் மண் அரிப்பு ஏற்பட்டிருப்பது கண்டறியப்பட்டுள்ளது. இதைத் தொடர்ந்து மண் அரிப்பு ஏற்பட்டுள்ள தூண்களை சீரமைக்கும் பணிகளில் ரயில்வே ஊழியர்கள் தொடர்ந்து ஈடுபட்டு வருகின்றனர். மூன்றாவது நாளாக விரிசலை சரி செய்யும் பணிகள் தொடர்வதால், இன்று சென்னை சென்ட்ரலில் இருந்து திருவனந்தபுரம் செல்லும் ரயில் மட்டும் ரத்து செய்யப்பட்டு, மற்ற ரயில்கள் மாற்றுப் பாதையில் இயக்கப்படுகின்றன.