வங்கதேச சுதந்திர போரில் இறந்த வீரர்களின் நினைவிடத்தில் பிரதமர் மோடி மரியாதை

1971ஆம் ஆண்டு நடைபெற்ற வங்கதேச விடுதலைப் போரில் வீரமரணம் அடைந்த வீரர்களின் நினைவிடத்தில் பிரதமர் மோடி அஞ்சலி செலுத்தினார்.

முன்னதாக 2 நாள் பயணமாக பிரதமர் மோடி, வங்கதேச தலைநகர் டாக்கா சென்றடைந்தார். விமான நிலையத்தில் வங்கதேச பிரதமர் ஷேக் ஹசீனா இந்திய பிரதமரை நேரில் வரவேற்றார். அப்போது 19 குண்டுகள் முழங்க பிரதமர் மோடிக்கு வரவேற்பு வழங்கப்பட்டது. இதன்பின் தேசிய போர் நினைவுச் சின்னத்தில் மறைந்த வீரர்களுக்கு அஞ்சலி செலுத்திய பிரதமர், இன்று மாலை தாகாவில் நடைபெறும் சுதந்திர தின பொன்விழா கொண்டாட்டங்களில் சிறப்பு விருந்தினராக பங்கேற்க உள்ளார்.

1971 ஆம் ஆண்டு பாகிஸ்தானிடம் இருந்து வங்கதேசம் தனி நாடாக பிரிந்ததும் இதற்காக நடந்த போரில் இந்தியா முக்கிய பங்காற்றியதும் குறிப்பிடத்தக்கது. அடுத்தபடியாக நாளை வங்கதேச பிரதமருடன் பேச்சுவார்த்தை நடத்துவதுடன் பல்வேறு ஒப்பந்தங்களிலும் பிரதமர் கையெழுத்திட உள்ளார். பிரதமருக்கு என உருவாக்கப்பட்டுள்ள போயிங் 777 சிறப்பு விமானத்தில் முதன்முறையாக மோடி வெளிநாடு சென்றது குறிப்பிடத்தக்கது. மேலும் 15 மாதங்களுக்கு பிறகு பிரதமர் மோடி மேற்கொள்ளும் முதல் வெளிநாட்டுப் பயணம் என்பதும் குறிப்பிடத்தக்கது.