மயிலாடுதுறை: அமோகமாக சிக்கிய மீன்கள்... அதிக விலை கிடைத்ததால் மீனவர்கள் மகிழ்ச்சி

சீர்காழி அருகே திருமுல்லைவாசல் மீன்பிடி துறைமுகத்தில் குவிந்த வியாபாரிகள். கிழிசை, கவலை, வாலை மீன்கள் கூடுதல் விலையுடன் அமோக விற்பனையால் மீனவர்கள் மகிழ்ச்சி அடைந்தனர்.

மயிலாடுதுறை மாவட்டம் சீர்காழி அருகே திருமுல்லைவாசல் மீனவர் கிராமத்தில் 1500 மீனவர் குடும்பத்தினர் வசித்து வருகின்றனர். இங்குள்ள மீன்பிடி துறைமுகத்தில் இருந்து நாள்தோறும் 800-க்கும் மேற்பட்ட படகுகளில் 3000 மீனவர் மீன்பிடி தொழில் செய்து வருகின்றனர். இங்கு பிடிக்கபடும் மீன்கள் உள்ளூர் விற்பனை மட்டுமின்றி கேரளா, கர்நாடகா போன்ற அண்டை மாநிலங்களுக்கும் ஏற்றுமதியாகிறது.

இந்நிலையில், கடந்த சில மாதங்களாகவே போதிய மீன்கள் கிடைக்காமல் மீனவர்கள் கவலை அடைந்திருந்த நிலையில் தற்போது அதிக அளவில் மீன்கள் கிடைக்க தொடங்கியுள்ளது. இன்று காலை முதலே கிழிசை, கவலை, வாலை மீன்கள் அதிக அளவில் பிடிபட்டது. அதே நேரம் உள்ளூர் வியாபாரிகளும் வெளி மாநில வியாபாரிகளும் போட்டி போட்டு மீன்களை விலைக்கு வாங்கினர்.

இதனால் 40 ரூபாய்க்கு விற்ற கவலை மீன் 70 ரூபாய்க்கும், 90 ரூபாய்க்கு விற்ற கிழிசை மீன் 135 ரூபாய்க்கும் கூடுதல் விலைக்கு விற்பனையானதால் திருமுல்லைவாசல் மீனவர்கள் மகிழ்ச்சியடைந்தனர்.