“மதத்தை தூண்டி விட்டு அரசியல் செய்கிறார்கள். ” - பிரேமலதா விஜயகாந்த்

2021 தேர்தலில் மிகப்பெரிய மாற்றம் ஏற்படும் என்றும், எந்தக் கட்சிக்கும் பெரும்பான்மை கிடைக்காது என்றும் தேமுதிக பொருளாளர் பிரேமலதா விஜயகாந்த் தெரிவித்தார்.

சென்னை கொளத்தூரில் நடைபெற்ற தேமுதிக நிர்வாகி கூட்டத்தில் பிரேமலதா விஜயகாந்த் பங்கேற்றார். விழாவில் பேசிய அவர், “மதத்தையும், மொழியையும் தூண்டி விட்டு அரசியல் செய்கிறார்கள். சிஏஏ என்றால் என்னவென்று மக்களுக்குப் புரியவில்லை. இந்த மண்ணை சேர்ந்தவர்களுக்கு சிஏஏ-வால் பாதிப்பு என்றால் தேமுதிக முதல் ஆளாக நிற்கும். சிஏஏ-வை வைத்து அரசியல் ஆதாயம் தேடப் பார்க்கிறார்கள்

அதிமுகவுடன் ஆரம்பத்தில் கூட்டணி அமைக்கப்பட்ட போது, மாநிலங்களவை உறுப்பினர் சீட் கேட்கப்பட்டது. கிடைக்கிறதா ? இல்லையா ? என்பதை பொறுத்திருந்து பார்க்கலாம். 2021 தேர்தல் நிச்சயமாக மாற்றத்தை ஏற்படுத்த கூடிய தேர்தலாக இருக்கும். எந்தக் கட்சிக்கும் அதிகப் பெரும்பான்மை கிடைக்காது. அதனால் மிகப்பெரிய மாற்றம் ஏற்படும். கூட்டணி பற்றிய முடிவை விஜயகாந்த் அறிவிப்பார்.

பொது நிகழ்ச்சிகளில் விஜயகாந்த் கலந்துக்கொள்ள தொடங்கியுள்ளார். முழு ஆரோக்கியத்துடன் இருக்கிறார். வருகிற நகர்ப்புற உள்ளாட்சித் தேர்தலில் பிரச்சாரத்தில் பங்குபெறுவார். 2021 சட்டமன்றத் தேர்தலுக்கு 6 மாத காலம் முன்பாகவே விஜயகாந்த் பிரச்சாரத்தை ஆரம்பிப்பார்” எனத் தெரிவித்தார்.