முகக்கவசம் அணியாத காவலரிடம் அபராதம் வசூலித்த போலீஸ் உயர் அதிகாரி..!

உலகெங்கும் கொரோனா வேகமாக பரவி வருவதால் முகக்கவசம் அணிவது அவசியம் என வலியுறுத்தப்பட்டு வருகிறது. இந்திய உட்பட பல நாடுகளில் முகக்கவசம் அணியாமல் பொது வெளியில் வருபவர்களிடம் அபராதமும் வசூலிக்கப்பட்டு வருகிறது. 

இந்தியாவில் பல்வேறு மாநிலங்களில் இதை கண்காணிக்க போலீசாரும் பணி அமர்த்தப்பட்டுள்ளனர். இந்நிலையில் உத்தர பிரதேச மாநிலம் பஹரச் மாவட்டத்தில் உள்ள பாண்டி காவல் நிலையத்தில் பணியாற்றும் காவல் நிலைய அதிகாரி சுபாஷ் சந்திர சிங் முகக்கவசம் அணியாத மக்களிடம் சலான் எழுதி அபராதம் வசூலித்துள்ளார். 

காவலர் சுபாஷ் சந்திர சிங் முகக்கவசம் அணியாமல் அந்த பணியை செய்துள்ளார் என போலீஸ் உயர் அதிகாரி விபின் மிஸ்ராவுக்கு தகவல் கிடைத்துள்ளது. அதனடிப்படையில் காவலர் சுபாஷிடம்  முகக்கவசம் அணியாத காரணத்தினால் அவருக்கு 500 ரூபாய் அபராதம் விதித்துள்ளார்.

"முகமூடி அணிவது ஒரு நபர், அவரது குடும்ப உறுப்பினர்கள் மற்றும் பொதுமக்களை பாதுகாக்கிறது. எங்கள் அதிகாரிகள் இந்த அடிப்படை விஷயங்களை கடைபிடிக்கவில்லை என்றால் நாங்கள் சமூகத்திற்காக என்ன செய்ய  முடியும்.

போலீஸார் தவறு செய்தாலும் அது சட்டத்தின் எல்லைக்குள்தான் வரும். ” என்று அவர் தெரிவித்தார்.