“என்றும் உங்களுடன் இருப்போம்” - ரஜினிகாந்த் குறித்து நடிகர் சதீஷ்

வாழ்வின் மிகச்சிறந்த புத்தாண்டு இதுதான் என்று நடிகர் சதீஷ், அவரது ட்விட்டர் பக்கத்தில் தெரிவித்துள்ளார்.

‘சிறுத்தை’ சிவா இயக்கத்தில் நடிகர் ரஜினிகாந்த் புதிய படம் ஒன்றில் நடித்து வருகிறார். அதற்கான படப்பிடிப்பு ஹைதராபாத் ராமோஜி ராவ் ஃபிலிம் சிட்டியில் தொடர்ந்து நடைபெற்று வருகிறது. இந்தப் படத்தின் முதல் நாள் படப்பிடிப்பில் படத்திற்கான பாடல் காட்சி எடுக்கப்பட்டதாக தகவல் வெளியானது. அதனையடுத்து குஷ்பு, மீனா ஆகிய இருவரும் இந்தப் படப்பிடிப்பில் பங்கேற்று நடித்து வருகின்றனர்.

இந்நிலையில், சில நாட்களுக்கு முன்பு  ‘தலைவர் 168’ படத்தில் ரஜினிகாந்துடன் இணைந்து காமெடி நடிகர் சதீஷ் நடிக்க இருப்பதாக அதிகாரப்பூர்வமான அறிவிப்பு வெளியானது. அதனை அடுத்து சதீஷ், தனது ட்விட்டர் பக்கத்தில் நடிகர் ரஜினிகாந்த்துடன் இணைந்து எடுத்துக் கொண்ட புகைப்படம் ஒன்றை பதிவிட்டுள்ளார்.

மேலும் அவர் தன் பதிவில், “வாழ்வின் மிகச்சிறந்த புத்தாண்டு என் தலைவருடன். உங்களைப் பார்த்துதான் வளர்ந்தோம். இன்று உங்களுடனேயே இருக்கிறோம். என்றும் உங்களுடன் இருப்போம். உங்கள் அனைவருக்கும் எனது அன்பு” எனத் தெரிவித்துள்ளார்.

இந்தப் படத்தில் இவரைத் தவிர்த்து சூரி, பிரகாஷ் ராஜ் உள்ளிட்ட பலர் நடிக்கின்றனர். ரஜினி படம் ஒன்றிற்கு முதன்முறையாக, டி இமான் இசையமைத்து வருகிறார் என்பது குறிப்பிடத்தக்கது.