வருமான வரித்துறையினர் போல நாடகம் ! ரூ.3 லட்சத்தை பறிகொடுத்த நபர்

சென்னை கொரட்டூரில் வருமான வரித்துறை அதிகாரிகளாக நடித்து மளிகைக்கடைகாரரிடம் மூன்று லட்சம் ரூபாய் பணம் மற்றும் வெள்ளிப் பொருட்கள் கொள்ளையடிக்கப்பட்ட சம்பவம் அரங்கேறியுள்ளது.

சென்னை கொரட்டூர் ரெட்டி தெருவில் சிவப்பிரகாசம் என்பவர் மளிகை கடை நடத்தி வருகிறார். அவரிடம் வாடகை காரில் வந்த மர்ம நபர்கள் ஐந்து பேர் வருமான வரித்துறை அதிகாரிகள் என்று கூறி தங்களை அறிமுகப்படுத்திக் கொண்டனர். அதற்கான போலி ஐடி கார்டையும் காட்டியுள்ளனர். கடை மற்றும் வீடு ஒரே இடத்தில் இருப்பதால் கடையை சோதனை செய்து பின்னர் மாடியில் இருந்த வீட்டையும் அவர்ள் சோதனை செய்துள்ளனர்.

பின்னர் வீட்டிலிருந்த மூன்று லட்சம் ரூபாய் பணம், ஐந்து கிலோ வெள்ளிப் பொருட்களை கொள்ளையடித்து அவர்கள் சென்றுவிட்டனர். கொள்ளையர்கள் போகும்போது நுங்கம்பாக்கத்தில் உள்ள வருமான வரித்துறை அலுவலகத்திற்கு வந்து முறையான கணக்கு காட்டிவிட்டு உங்கள் பணத்தை திரும்ப பெற்றுக் கொள்ளலாம் என்று கூறி விட்டு சென்றுள்ளனர்.

சிவப்பிரகாசம் நுங்கம்பாக்கம் சென்று அலுவலகத்தில் விசாரித்தபோது அதுபோன்ற நபர்கள் யாரும் இல்லை என்று தெரிவித்ததால் அதிர்ச்சியடைந்தார். பின்னர் கொரட்டூர் காவல்நிலையத்தில் புகார் அளித்துள்ளார். அதனைத்தொடர்ந்து வழக்குப்பதிவு செய்து போலீசார் தீவிரமாக தேடி வருகின்றனர். இச்சம்பவம் கொரட்டூர் பகுதி மக்கள் பீதியடைந்தனர்.