பாகுபலி அரண்மனையை பார்க்கத் தயாரா..?

பாகுபலி படத்திற்காக போடப்பட்ட பிரமாண்டமான அரண்மனை செட்டிங் பொதுமக்கள் பார்வைக்காக திறக்கப்பட்டுள்ளது.  

எஸ்.எஸ்.ராஜமவுலி இயக்கத்தில் வெளியான பாகுபலி படத்தின் இரு பாகங்களும் மாபெரும் வெற்றியைப் பெற்றன. பலநூறு கோடி ரூபாய் செலவில்  உருவாக்கப்பட்ட இந்த வரலாற்றுப் படத்திற்காக ஹைதராபாத் ராமோஜி ராவ் பிலிம் சிட்டிக்குள் மிகப் பிரம்மாண்டமான அரண்மனை  செட் ஒன்று  அமைக்கப்பட்டது. அந்த அரண்மனையை உருவாக்க ஆண்டுகளாக நூற்றுக் கணக்கான கலைஞர்கள் இரவு பகலாக  உழைத்தனர். அவர்களின் கடின உழைப்பில்  தயாரான அந்த அரண்மனை செட்டுக்கு மட்டும் பலகோடி செலவானது. 

படப்பிடிப்பு முடிந்து ஆறு ஆண்டுகள் கடந்தப் பின்பும் அந்த செட்டை அகற்றாமல் அப்படியே பாதுகாத்து வந்தனர். இந்நிலையில்,’மஹிஸ்மதி’எனப் பெயர்  சூட்டப்பட்டுள்ள அந்த அரண்மனை இப்போது பொதுமக்கள் கண்டுகளிக்கும் சுற்றுலாத் தலமாக மாற்றப்படுள்ளது. இதனைத் தொடர்ந்து பொதுமக்கள் ஆர்வமாக  சென்று அந்த அரண்மனையை கண்டு ரசித்து வருகின்றனர். தேவைப்பட்டால் இங்கு படப்பிடிப்பையும் நடத்திக் கொள்ளலாம் என்று தயாரிப்புக் குழுவினர்  அறிவித்துள்ளனர்.