மகாராஷ்டிரா கட்டிட விபத்து: 19 பேருக்கும் மேற்பட்டோர் சிக்கியிருக்கலாம் என தகவல்!

மகாராஷ்டிராவில் அடுக்குமாடி கட்டிடம் இடிந்து விழுந்து விபத்துக்குள்ளானதில் மேலும் 19 பேர் சிக்கி இருக்கலாம் என்பதால் மீட்புப் பணிகள் தீவிரமடைந்துள்ளது.

மகாராஷ்டிரா மாநிலத்தின் ராய்காட் மாவட்டத்தின் மகாட் என்ற பகுதியில் அமைந்துள்ள 5 மாடி கட்டிடம் நேற்று மாலை திடீரென இடிந்து விழுந்தது.

47 குடியிருப்புகளை கொண்டிருந்த அந்த அடுக்குமாடி கட்டிடத்தில் நூறுக்கும் மேற்பட்டோர் வசித்து வந்ததாக தகவல் வெளியானது. ஆனால், கட்டிடம் இடிந்து விழுவதற்கு சிலமணி நேரத்திற்கு முன்னர் பலர் தங்கள் வீடுகளை விட்டு வெளியே வந்துவிட்டதாக கூறப்படுகிறது.

எனினும் கட்டிடம் நேற்று மாலை இடிந்து விழுந்தபோது அந்த இடிபாடுகளுக்குள் பலர் சிக்கிக்கொண்டனர். அதில் இருவர் உயிரிழந்துள்ளனர். தற்போது வரை 7 பேர் மீட்கப்பட்டுள்ளனர். 19 பேரை காணவில்லை என்பதால் அவர்கள் இடிபாடுகளில் சிக்கியிருக்கக்கூடும் என அஞ்சப்படுகிறது.

இதனால் இடிந்து விழுந்த கட்டிடத்தின் கீழ் தேடுதல் மற்றும் மீட்பு நடவடிக்கைகள் இன்னும் தொடர்கின்றன.