கொரோனா தடுப்புப் பணிகளைக் கையாள்வதில் அலட்சியம் - காஞ்சிபுரம் மக்கள் புகார்

காஞ்சிபுரம் பெருநகராட்சி கொரோனா தடுப்புப் பணிகளைக் கையாள்வதில் அலட்சியம் காட்டுவதாகப் பொதுமக்கள் குற்றம் சாட்டுகின்றனர்.

காஞ்சிபுரம் பெருநகராட்சிக்கு உட்பட்ட 45வது வார்டு தாயார்குளம் பகுதியில் கொரோனா தொற்றால் சிலர் பாதிக்கப்பட்டதாகத் தெரிகிறது. இந்நிலையில் அந்த இடமானது கடந்த மூன்று நாட்களைக் கடந்தும் தடை செய்யப்பட்ட பகுதியாக அறிவிக்கப்படவில்லை எனவும் தடுப்புகளும் அமைக்கப்படவில்லை எனவும் கூறப்படுகிறது.

சுகாதார பணியாளர்களும் அந்த இடத்தில் எந்தத் துப்புரவு பணிகளை மேற்கொள்ள வில்லை என்றும் கொரோனாவால் பாதிக்கப்பட்ட நபரை மருத்துவமனைக்கு அனுப்பி வைத்த பிறகும் கூட அந்த இடத்தில் அதிகாரிகள் நேரில் ஆய்வுப் பணிகளை மேற்கொள்ள வில்லை என்றும் பொதுமக்கள் புகார் தெரிவித்தனர். இது குறித்து நகராட்சி அதிகாரிகளுக்குப் பல முறை தகவல் தெரிவித்தும் அதிகாரிகள் முறையான நடவடிக்கை எடுக்கவில்லை எனவும் மக்கள் குற்றம் சாட்டினர்.

இது மட்டுமல்லாமல் கொரோனா நோயாளிகளின் குடும்பத்தினரும் வெளியே சுற்றி வருவதால் தாயார்குளம் மக்கள் மத்தியில் அச்சம் நிலவி வருகிறது. ஆகவே உடனடியாக கொரோனா நோயாளியின் வீட்டை முழுவதுமாக தனிமைப்படுத்தி அந்த இடம் முழுவதுமாக தடைசெய்ய வேண்டும் என்றும் சுகாதாரப் பணிகளை மேற்கொள்ள வேண்டும் எனக் கோரிக்கை வைத்துள்ளனர்.