வேண்டாமென்ற பவுன்சர்கள் : ரசிகர்களுக்காக காரிலிருந்து இறங்கிய விஜய்..!

தனது 63வது படப்பிடிப்பின்போது, காரிலிருந்து இறங்கி ரசிகர்களுக்கு விஜய் கை அசைக்கும் வீடியோ ஒன்று வைரலாகியுள்ளது.

அட்லி இயக்கத்தில் விஜய் நடித்து வரும் பெயரிடப்படாத ‘தளபதி63’ படத்தின் படப்பிடிப்பிடிப்பு நடைபெற்று வருகின்றது. இந்தப் படத்தின் பூஜை அண்மையில் நடைப்பெற்றது. இந்தப் படம் விஜய் மற்றும் அட்லி இணையும் மூன்றாவது திரைப்படம் ஆகும். ஏற்கனவே இருவரும் இணைந்த ‘தெறி’ மற்றும் ’மெர்சல்’ ஆகிய படங்கள் வெற்றி பெற்றதால், இந்தப் படத்திற்கு மிகுந்த எதிர்பார்ப்பு உள்ளது.

இப்படத்திற்கு இசைப்புயல் ஏ.ஆர்.ரகுமான் இசையமைக்கிறார். படத்தின் கதாநாயகியாக நயன்தாரா நடிக்கிறார். இதுதவிர யோகி பாபு மற்றும் கதிர் உள்ளிட்டோர் படத்தில் இடம்பெறுகின்றனர். கல்பாத்தி அகோரம் இந்தப் படத்தை தயாரிக்கிறது. இந்நிலையில் படத்தின் படப்பிடிப்பு தளத்தில் விஜய் இருப்பதை அறிந்து அங்கு அவரது ரசிகர்கள் திரண்டுவிட்டனர்.

இதனால் படப்பிடிப்பு தளத்தின் பின்புற வாசல் வழியாக சென்றுவிடும்படியும், காரில் இருந்து இறங்க வேண்டாம் என்று அங்கு பாதுகாப்பு பணியில் இருந்த பவுன்சர்கள் அறிவுறுத்தியுள்ளனர். ஆனால் ரசிகர்கள் ஏமாற்றம் அடைவார்கள் என்பதால், காரில் இருந்து இறங்கி தனது ரசிகர்களை பார்த்து கை அசைத்தார். இந்த வீடியோ தற்போது விஜய் ரசிகர்களால் வைரலாக பகிரப்பட்டு வருகிறது.