OG கம்பேக்| ஒரே போட்டி.. 3 ஜாம்பவான்களின் சாதனைகளை நொறுக்கிய ஸ்மித்!

ஆஸ்திரேலியாவிற்கு சுற்றுப்பயணம் செய்திருக்கும் பென் ஸ்டோக்ஸ் தலைமையிலான இங்கிலாந்து அணி 5 டெஸ்ட் போட்டிகள் கொண்ட ஆஷஸ் தொடரில் விளையாடிவருகிறது. முதல் 3 போட்டிகளில் டாமினேட் செய்த ஆஸ்திரேலியா அணி 3-0 என ஆஷஸ் தொடரை கைப்பற்றி அசத்தியது..

இந்த சூழலில் மெல்போர்னில் நடைபெற்ற 4வது போட்டியில் பந்துவீச்சில் மிரட்டிய இங்கிலாந்து அணி, ஆஸ்திரேலியாவை அவர்களின் சொந்தமண்ணில் 15 ஆண்டுகளுக்கு பிறகு வீழ்த்தி சாதனை படைத்தது.

இந்நிலையில் இரண்டு அணிகளுக்கும் இடையிலான கடைசி மற்றும் 5வது டெஸ்ட் போட்டி சிட்னி மைதானத்தில் நடைபெற்று வருகிறது..

சிட்னியில் தொடங்கிய 5வது டெஸ்ட் போட்டியில் முதலில் பேட்டிங் செய்த இங்கிலாந்து அணி 384 ரன்கள் குவித்து ஆட்டமிழந்தது. சிறப்பான பேட்டிங்கை வெளிப்படுத்திய நட்சத்திர வீரர் ஜோ ரூட் ஆஸ்திரேலியா மண்ணில் தன்னுடைய இரண்டாவது டெஸ்ட் சதத்தை பதிவுசெய்து அசத்தினார். ஜோ ரூட் 160 ரன்கள் குவித்து ஆட்டமிழந்தார்..

தொடர்ந்து முதல் இன்னிங்ஸில் விளையாடிவரும் ஆஸ்திரேலியா 3வது நாள் முடிவில் 7 விக்கெட் இழப்புக்கு 518 ரன்கள் குவித்துள்ளது. தொடக்கத்திலேயே அதிரடியாக விளையாடிய டிராவிஸ் ஹெட் நடப்பு ஆஷஸ் தொடரில் 3வது சதத்தை பதிவுசெய்து அசத்தினார்.

டிராவிஸ் ஹெட் 163 ரன்கள் அடிக்க, தொடர்ந்து வந்த ஆஸ்திரேலியா கேப்டன் ஸ்டீவ் ஸ்மித் 37வது டெஸ்ட் சதத்தை பதிவுசெய்து அசத்தினார். ஆட்டநேர முடிவில் 129 ரன்களுக்கு ஆட்டமிழக்காமல் நீடிக்கிறார் ஸ்டீவ் ஸ்மித்..

டான் பிராட்மேன் - இங்கிலாந்து அணிக்கு எதிராக அதிக ரன்கள் அடித்த டான் பிராட்மேனின் சாதனையை முறியடித்தார் ஸ்டீவ் ஸ்மித். டான் பிராட்மேன் இங்கிலாந்துக்கு எதிராக 5028 ரன்களை குவித்திருந்த நிலையில், ஸ்டீவ் ஸ்மித் 5085* ரன்கள் அடித்து முன்னிலை பெற்றுள்ளார். இதன்மூலம் ஒரு அணிக்கு எதிராக அதிக சர்வதேச ரன்கள் அடித்த ஆஸ்திரேலியா வீரர் என்ற டான் பிராட்மேன் சாதனையையும் உடைத்துள்ளார் ஸ்டீவ் ஸ்மித்..

ராகுல் டிராவிட் - அதிக டெஸ்ட் சதங்கள் அடித்தவர்கள் பட்டியலில் 36 சதங்களுடன் இருந்த ராகுல் டிராவிட்டை பின்னுக்கு தள்ளி 6வது இடத்திற்கு முன்னேறியுள்ளார் ஸ்டீவ் ஸ்மித். முதல் 5 இடத்தில் சச்சின் டெண்டுல்கர் (51 சதங்கள்), ஜாக் காலிஸ் (45), ரிக்கி பாண்டிங் மற்றும் ஜோ ரூட் (41), குமார் சங்ககரா (38) என முன்னிலை பெற்றுள்ளனர்.

ஜாக் ஹொப்ஸ் - ஆஷஸ் டெஸ்ட் தொடரில் அதிக சதங்கள் அடித்தவர்கள் பட்டியல் இங்கிலாந்து ஜாம்பவான் ஜாக் ஹோப்ஸை பின்னுக்கு தள்ளி டான் பிராட்மேனுக்கு பிறகு 2வது இடத்தை பிடித்துள்ளார் ஸ்டீவ் ஸ்மித். முதல் 3 இடங்களில் டான் பிராட்மேன் 19 சதங்கள், ஸ்டீவ் ஸ்மித் 13 சதங்கள், ஜாக் ஹோப்ஸ் 12 சதங்களுடன் நிலைக்கின்றனர்.

அதேபோல ஆஷஸ் தொடரில் அதிக ரன்கள் அடித்த இரண்டாவது வீரர் என்ற ஜாக் ஹோப்ஸ் சாதனையையும் முறியடித்துள்ளார் ஸ்மித். முதல் 3 இடங்களில் டான் பிராட்மேன் 5028 ரன்கள், ஸ்டீவ் ஸ்மித் 3682 ரன்கள், ஜாக் ஹோப்ஸ் 3636 ரன்களுடன் நீடிக்கின்றனர்.