இஸ்ரேல் - காஸா போர்| 2 ஆண்டுகளில் 38,000 பெண்கள் கொலை.. ஐ.நா. அதிர்ச்சி ரிப்போர்ட்!

இஸ்ரேல் - காசா போர்நிறுத்தம் அமலில் இருந்தும் உணவு, மருத்துவம் இல்லாததால் மரணங்கள் தொடர்கின்றன. அடிப்படை கட்டமைப்பு சேதம் காரணமாக சுகாதார சேவைகள் எட்டாக்கனியாகியுள்ளன.

ஐ.நா. பெண்கள் அமைப்பு (U.N. Women) வெள்ளிக்கிழமையன்று வெளியிட்ட புள்ளிவிவரங்களின்படி, காசா போரின் போது தினமும் சராசரியாகக் குறைந்தது 47 பெண்களும் சிறுமிகளும் கொல்லப்பட்டுள்ளனர். மேலும், ஒரு நிலையற்ற போர்நிறுத்தம் அமலுக்கு வந்து ஆறு மாதங்கள் கடந்த பின்னரும் உயிரிழப்புகள் தொடர்ந்து வருவதாக ஐநா எச்சரித்துள்ளது.

பாலின சமத்துவத்தில் கவனம் செலுத்தும் அமைப்பான ஐ.நா. பெண்கள் அமைப்பின் அறிக்கையின்படி, அக்டோபர் 2023 முதல் டிசம்பர் 2025 வரையிலான காலகட்டத்தில் காசாவில் 38,000-க்கும் மேற்பட்ட பெண்களும் சிறுமிகளும் கொல்லப்பட்டுள்ளனர் .

காசாவில் இதற்கு முன் நிகழ்ந்த மோதல்களில் காணப்பட்டதை விட, தற்போதைய மோதல்களில் உயிரிழந்தோரில் பெண்களும் சிறுமிகளும் மிக அதிக விகிதத்தில் இடம்பெற்றுள்ளனர். அக்டோபர் மாதத்தில் ஏற்பட்ட போர்நிறுத்தத்திற்குப் பின்னரும் உணவு, மருத்துவமின்றி தவிப்பதால் பெண்கள் மற்றும் சிறுமிகள் கொல்லப்படுவது தொடர்ந்து நடந்து வருகிறது

அடிப்படை கட்டமைப்புகளுக்கு ஏற்பட்டுள்ள பெருத்த சேதத்தின் காரணமாக, காசாவில் உள்ள பெண்களும் சிறுமிகளும் சுகாதாரம் போன்ற தங்களின் அடிப்படைத் தேவைகளைப் பெறுவது ஏறக்குறைய சாத்தியமற்றதாகிவிட்டது கூறுகிறது அந்த அறிக்கை.

5,00,000-க்கும் மேற்பட்ட பெண்களுக்கு, கர்ப்பகால மற்றும் பிரசவத்திற்குப் பிந்தைய பராமரிப்பு, பாலியல் ரீதியாகப் பரவும் நோய்த்தொற்றுகளுக்கான சிகிச்சை உள்ளிட்ட அத்தியாவசியச் சேவைகள் கிடைப்பதில்லை என்று உலக சுகாதார நிறுவனத்தின் புள்ளிவிவரங்கள் காட்டுகின்றன.

அக்டோபர் மாதப் போர்நிறுத்தம், கடந்த இரண்டு ஆண்டுகளாக நடைபெற்று வந்த முழு அளவிலான போரை முடிவுக்குக் கொண்டுவந்தது. இருப்பினும், காசாவின் பாதிக்கும் மேற்பட்ட பரப்பளவைக் கொண்ட, மக்கள் நடமாட்டமற்ற ஒரு பகுதியின் கட்டுப்பாடு இஸ்ரேலியப் படைகளிடமே இருக்கிறது . எஞ்சியுள்ள, குறுகிய கடலோரப் பகுதி ஹமாஸ் அமைப்பு அதிகாரத்தில் உள்ளது.