உலகம் முழுவதும் ஆடவர் கிரிக்கெட் அணியைப் போன்று மகளிர் அணியும் பல போட்டிகளில் வாகைசூடி வருகிறது. இந்த நிலையில், பாகிஸ்தான் மகளிர் அணியைச் சேர்ந்த இரண்டு வீராங்கனைகள் கார் விபத்தில் சிக்கி உள்ளதாக பாகிஸ்தான் கிரிக்கெட் போர்டு தெரிவித்துள்ளது.
பாகிஸ்தான் மகளிர் அணி, மேற்கிந்திய தீவு அணிகளுக்கு எதிராக 3 போட்டிகள் கொண்ட ஒருநாள் தொடரிலும், அதைத் தொடர்ந்து 5 டி20 போட்டிகளிலும் பங்கேற்று அடுத்தடுத்து விளையாட இருக்கிறது. இதற்கான பயிற்சி முகாம் ஏப்ரல் 18 அன்று தொடங்க இருக்கிறது. இந்த தொடருக்கான பட்டியலில் பாகிஸ்தான் வீராங்கனைகளான பிஸ்மா மரூப் மற்றும் சுழற்பந்து வீச்சாளர் குலாம் பாத்திமா ஆகியோரது பெயர்கள் இடம்பெற்றுள்ளன.
இந்த நிலையில் இவர்கள் இருவரும் பயணித்த கார் விபத்தில் சிக்கியதாக தகவல் வெளியாகி உள்ளது. இந்த விபத்தில் அவர்கள் இருவருக்கும் சிறு காயங்கள் ஏற்பட்டிருப்பதாகவும், அவர்களுக்கு உடனடியாக முதலுதவி வழங்கப்பட்டிருப்பதாகவும் தொடர்ந்து மருத்துவக் கண்காணிப்பில் இருப்பதாகவும் பாகிஸ்தான் கிரிக்கெட் வாரியம் தெரிவித்துள்ளது.
இந்த விபத்து நேற்று (ஏப்ரல் 5) ஏற்பட்டதாக தெரியப்படுத்தியிருக்கும் பாகிஸ்தான் கிரிக்கெட் வாரியம், விபத்து பற்றிய முழு விவரங்களை தெரிவிக்கவில்லை.
