பீகார் | தாய்ப்பாலில் யுரேனியமா..? குழந்தைகளுக்கு புற்றுநோய் வருமா? மருத்துவர்கள் எச்சரிக்கை!

பீகார் மாநிலத்தின் மொத்த மக்கள்தொகையான104,099,452 பேரில், 49,821,295 பெண்கள் இருப்பதாக தரவுகள் தெரிவிக்கின்றன. இந்த நிலையில், பீகார் மாவட்டங்களில் உள்ள பெண்களின் தாய்பாலில், அணுகுண்டு தயாரிக்க பயன்படும் யுரேனியம் இருப்பதாக வெளியாகி இருக்கும் செய்தி அதிர்ச்சியை ஏற்படுத்தியுள்ளது.

பீகாரின் போஜ்பூர், சமஸ்திபூர், பெகுசராய், ககாரியா, கதிஹார் மற்றும் நலந்தா ஆகிய ஆறு மாவட்டங்களிலிருந்து 17 முதல் 35 வயதுக்குட்பட்ட 40 பாலூட்டும் பெண்களை ஆராய்ச்சியாளர்கள் தேர்ந்தெடுத்தனர். அக்டோபர் 2021 முதல் ஜூலை 2024 வரை ஒவ்வொரு பெண்ணிடமிருந்தும் 5 மில்லி தாய்ப்பாலின் மாதிரிகளைச் சேகரித்து, பீகாரில் உள்ள ஓர் ஆய்வகத்தில் ICP-MSஐப் பயன்படுத்தி யுரேனியம் (U-238) செறிவை அளந்தனர். இந்த ஆய்வு, பாட்னாவில் உள்ள மகாவீர் புற்றுநோய் சன்ஸ்தான் மற்றும் ஆராய்ச்சி மையம், லவ்லி புரொஃபஷனல் பல்கலைக்கழகம் மற்றும் எய்ம்ஸ் புது டெல்லி ஆகியவற்றின் மருத்துவ விஞ்ஞானிகளால் நடத்தப்பட்டது.

அதன்படி, பரிசோதிக்கப்பட்ட அனைத்து மாதிரிகளிலும் யுரேனியம் இருந்ததாகவும், கதிஹார் மாவட்டத்தில்தான் இது மிக உயர்ந்த அளவில் இருப்பதாகவும் ஆய்வில் தெரிய வந்துள்ளது. தாய்ப்பாலின் மூலம் யுரேனியம் வெளிப்படுவது குழந்தைகளுக்கு குறிப்பிடத்தக்க புற்றுநோய் அல்லாத உடல்நல அபாயங்களை ஏற்படுத்தக்கூடும் என்று ஆராய்ச்சியாளர்கள் கண்டறிந்துள்ளதால், பெற்றோர்கள் கவலையடைந்துள்ளனர். 70% குழந்தைகளுக்கு HQ > 1 இருப்பதாக ஆய்வில் தெரியவந்துள்ளது. இது, தாய்ப்பாலின் மூலம் யுரேனியம் வெளிப்படுவதால் ஏற்படக்கூடிய புற்றுநோய் அல்லாத உடல்நல அபாயங்களைக் குறிக்கிறது.

இது, தொடர்ந்தால், சிறுநீரகம், நரம்பியல், அறிவாற்றல் மற்றும் மனநல விளைவுகள் ஏற்படும் என மருத்துவர்கள் எச்சரிக்கின்றனர். இருப்பினும், தாய்ப்பாலின் மாதிரிகளில் (0-5.25 ug/L) காணப்பட்ட யுரேனியம் செறிவுகளின் அடிப்படையில், குழந்தையின் ஆரோக்கியத்தில் உண்மையான தாக்கம் குறைவாகவே இருக்கும் என்றும், தாய்மார்களால் உறிஞ்சப்படும் பெரும்பாலான யுரேனியம் முதன்மையாக சிறுநீர் வழியாக வெளியேற்றப்படுகிறது என்றும், தாய்ப்பாலில் குவிக்கப்படவில்லை என்றும் ஆய்வு இன்னும் முடிவு செய்கிறது. இதனால், தாய்ப்பால் கொடுப்பது பரிந்துரைக்கப்படுகிறது.

இதுதொடர்பாக ஆய்வின் இணை ஆசிரியரான டெல்லி AIIMS டாக்டர் அசோக் சர்மா ANIக்கு அளித்துள்ள பேட்டியில், "இந்த ஆய்வு 40 பாலூட்டும் தாய்மார்களின் தாய்ப்பாலை பகுப்பாய்வு செய்து அனைத்து மாதிரிகளிலும் யுரேனியம் (U-238) இருப்பதைக் கண்டறிந்தது. 70% குழந்தைகளுக்கு புற்றுநோய் அல்லாத உடல்நல அபாயம் இருந்தாலும், ஒட்டுமொத்த யுரேனியம் அளவுகள் அனுமதிக்கப்பட்ட வரம்புகளுக்குக் கீழே இருந்தன. மேலும் தாய்மார்கள் மற்றும் குழந்தைகள் இருவருக்கும் குறைந்தபட்ச உண்மையான உடல்நலப் பாதிப்பை ஏற்படுத்தும் என்று எதிர்பார்க்கப்படுகிறது. யுரேனியம் வெளிப்பாடு நரம்பியல் வளர்ச்சி மற்றும் IQ குறைதல் போன்ற அபாயங்களை ஏற்படுத்தக்கூடும் என்றாலும், தாய்ப்பால் கொடுப்பதை நிறுத்தக்கூடாது, மேலும் மருத்துவரீதியாக சுட்டிக்காட்டப்படாவிட்டால் குழந்தை ஊட்டச்சத்தின் மிகவும் பயனுள்ள ஆதாரமாக இது உள்ளது” என அதில் தெரிவித்துள்ளார்.

தாய்பாலில் யுரேனியம் இருப்பதற்கு நிலத்தடிநீர் மாசு, சுற்றுச்சூழல் மாசுபாடு போன்றவையே காரணம் எனச் சொல்லப்படுகிறது. யுரேனியம் ஒரு கன உலோகம், இது உடலுக்கு இரண்டு முக்கிய வழிகளில் தீங்கு விளைவிக்கும். ஒன்று, அதன் இரசாயன நச்சுத்தன்மை. மற்றொன்று அதன் கதிரியக்க பண்புகள் மூலம். அசுத்தமான நீர் அல்லது உணவு மூலம் உட்கொள்ளப்படும்போது, ​​யுரேனியம் உறுப்புகளில், குறிப்பாக சிறுநீரகங்களில் குவிந்துவிடும், அங்கு அது வடிகட்டுதலை பாதித்து காலப்போக்கில் சிறுநீரக செல்களை சேதப்படுத்தும். இயற்கையாக நிகழும் கதிரியக்க தனிமமே யுரேனியம் ஆகும். இது, பொதுவாக கிரானைட் மற்றும் பிற பாறைகளில் காணப்படுகிறது.

இது சுரங்கம், நிலக்கரி எரித்தல், அணுசக்தி தொழில்துறை உமிழ்வுகள் மற்றும் பாஸ்பேட் உரங்களின் பயன்பாடு போன்ற மனித நடவடிக்கைகள் மூலம் நிலத்தடி நீரை மாசுபடுத்தும். இந்தியாவில், 18 மாநிலங்களில் உள்ள 151 மாவட்டங்களில் யுரேனியம் மாசுபாடு பதிவாகியுள்ளது. பீகாரில் 1.7 சதவீத நிலத்தடி நீர் ஆதாரங்கள் பாதிக்கப்பட்டுள்ளன. உலகளவில், கனடா, அமெரிக்கா, பின்லாந்து, சுவீடன், சுவிட்சர்லாந்து, இங்கிலாந்து, பங்களாதேஷ், சீனா, கொரியா, மங்கோலியா, பாகிஸ்தான் மற்றும் கீழ் மீகாங் டெல்டா பகுதி உள்ளிட்ட நாடுகளில் உயர்ந்த யுரேனிய அளவுகள் காணப்படுகின்றன. முந்தைய உலகளாவிய ஆய்வுகள் நிலத்தடி நீரில் அதிக யுரேனியம் செறிவுகளைக் காட்டினாலும், மக்களிடம் உடல்நலப் பாதிப்புகள் எதுவும் கண்டறியப்படவில்லை. ஆனால், தற்போதைய ஆராய்ச்சி, தாய்மார்கள் மற்றும் அவர்களின் குழந்தைகளுக்கு ஏற்படக்கூடிய சுகாதார அபாயங்களை மதிப்பிடுவதற்கான அவசரத் தேவையைக் கவனத்தில் கொள்கிறது.