காஸா மீதான தாக்குதல் 4ஆவது வாரத்தை நெருங்கி வரும் நிலையில் போரை மேலும் தீவிரப்படுத்தப்போவதாக இஸ்ரேல் தெரிவித்துள்ளது. குறிப்பாக ஹமாஸின் மிகப்பெரிய பலமாக பார்க்கப்படும் சுரங்கப்பாதைகளை அழிப்பதில் இஸ்ரேல் முனைப்பு காட்டி வருகிறது. இதுவரை வான்வழித்தாக்குதலில் மட்டுமே ஈடுபட்டிருந்த இஸ்ரேல் தற்போது தரைவழித்தாக்குதல்களும் மெல்ல ஒத்திகை பார்க்கத் தொடங்கியுள்ளது.
கடந்த 2 நாட்களாக இஸ்ரேல் பீரங்கிகள் காஸா நிலப்பரப்பிற்குள் ஊடுருவி தாக்குதல் நடத்தியிருந்தன. அடுத்து முழு வீச்சில் இஸ்ரேல் தரைவழித்தாக்குதல் நடத்தும் என எதிர்பார்க்கப்படுகிறது. ஆனால் இஸ்ரேல் எவ்வளவு தீவிரமாக தாக்குதல் நடத்தினாலும் அதை எதிர்கொள்ள தயார் நிலையில் இருப்பதாக ஹமாஸ் அறிக்கை ஒன்றை வெளியிட்டுள்ளது. நெதன்யாகுவின் படைகள் ஒருபோதும் வெற்றியை ஈட்ட முடியாது என்றும் ஹமாஸ் தெரிவித்துள்ளது.
இதற்கிடையே காஸா மீது இஸ்ரேல் நடத்திய தாக்குதலில் காஸாவின் இணைய சேவை, செல்போன் சேவை மட்டுமல்லாது வழக்கமான தொலைபேசி இணைப்புகளும் துண்டிக்கப்பட்டுள்ளன. இதன் காரணமாக தங்களது ஊழியர்களை தொடர்பு கொள்ள முடியவில்லை என ஐநாவும் செஞ்சிலுவைச் சங்கமும் தெரிவித்துள்ளது.
இந்நிலையில் இஸ்ரேல் விமானப்படை நடத்திய தாக்குதலில் ஹமாஸின் விமானப்படைத் தளபதி அட்சம் அபூ ரஃபா உயிரிழந்தார் என இஸ்ரேல் ராணுவம் தெரிவித்துள்ளது. இருந்த போதும் ஹமாஸ் அமைப்பு இதுகுறித்து எந்த ஒரு தகவலையும் அளிக்கவில்லை.
ஏற்கெனவே ஹமாஸின் நிதியமைச்சர் மற்றும் ஹமாஸின் பாதுகாப்பு தடவாளங்களை கவனிக்கும் தளபதிகளையும் இஸ்ரேல் ராணுவம் குறிவைத்து தாக்குதலுக்கு உள்ளாக்கி வரும் சூழலில், தற்போது விமானப்படைத் தளபதியையும் இஸ்ரேல் ராணுவம் கொன்றுள்ளதாக தகவல் வெளியாகியுள்ளது அங்கு மேலும் பதற்றத்தை ஏற்படுத்தியுள்ளது.
