உயிருக்கு ஆபத்தான நிலையில் வங்கதேச Ex. பிரதமர்.. தேர்தலில் போட்டியிடுவதாக இருந்தவருக்கு என்ன ஆனது?

வங்காளதேசத்தின் முன்னாள் அதிபரும், அந்நாட்டின் தேசியவாதக் கட்சியின் நிறுவனருமான ஜியாவுர் ரஹ்மானின் மனைவியான கலீதா ஜியா, இரண்டு முறை (1991-1996, மற்றும் 2001-2006) பிரதமராக இருந்தவர். இன்னும் சொல்லப்போனால், வங்காளதேச அரசியலில் ஆதிக்கம் செலுத்திய இரண்டு பேகம்களில் கலீதா ஜியாவும் ஒருவர். மற்றொருவர், தற்போது இந்தியாவில் தஞ்சமடைந்திருக்கும் ஷேக் ஹசீனா. இருவரின் ஆதிக்கப் போட்டி பல தசாப்தங்களாக நாட்டின் ஆட்சி மற்றும் கட்சி அரசியலை வடிவமைத்தது. ஹசீனாவின் ஆட்சியின்போது. கலீதா ஜியா ஊழல் குற்றச்சாட்டுகளில் குற்றவாளி என நிரூபிக்கப்பட்டு 2018இல் 17 ஆண்டுகள் சிறைத்தண்டனை விதிக்கப்பட்டார்.

2019 முதல் வீட்டுக் காவலில் இருந்த ஜியா, ஆகஸ்ட் 2024இல் ஷேக் ஹசீனா அரசாங்கத்தின் வீழ்ச்சிக்குப் பிறகு அனைத்து குற்றச்சாட்டுகளிலிருந்தும் விடுவிக்கப்பட்டார். ஹசீனா பதவி நீக்கம் செய்யப்பட்டு, ஆகஸ்ட் 2024இல் இடைக்கால நிர்வாகத்தின் தலைவராக முகமது யூனுஸ் பதவியேற்ற பிறகு, லண்டனில் இருந்து திரும்பினார். 2025 ஜனவரி முதல் லண்டனில் நான்கு மாதங்கள் தனது மகனும் பிஎன்பி தலைவருமான தாரிக் ரஹ்மானுடன் மருத்துவச் சிகிச்சையில் இருந்த கலீதா ஜியா, பின்னர் மே மாதம் வங்கதேசம் திரும்பினார்.

இந்த நிலையில், 80 வயதான அவர், நுரையீரல் மற்றும் இதயத்தில் தொற்று காரணமாக கடந்த நவம்பர் 23ஆம் தேதி டாக்காவில் உள்ள எவர்கேர் மருத்துவமனையில் அனுமதிக்கப்பட்டார். இந்தச் சூழலில், அவரது உடல்நிலை மிகவும் மோசமாக இருப்பதாக கட்சித் தலைவர்கள் தெரிவித்துள்ளனர். அவரது உடல்நிலை மிகவும் மோசமாக இருப்பதாக மருத்துவர்கள் கூறியதாக பிஎன்பி பொதுச் செயலாளர் மிர்சா ஃபக்ருல் இஸ்லாம் ஆலம்கீர் தெரிவித்துள்ளார். இது, நாட்டிலும் அவரது கட்சித் தொண்டர்கள் மத்தியிலும் சோகத்தை ஏற்படுத்தியிருக்கும் நிலையில், அவர் குணமடைய பிரார்த்தனை செய்து வருகின்றனர்.

அடுத்த ஆண்டு வங்கதேசத்தில் பொதுத் தேர்தல் நடைபெற இருக்கிறது. இந்தத் தேர்தலில் ஹசீனாவின் அவாமி லீக் கட்சி தடை செய்யப்பட்டுள்ளது. இதனால் அந்தத் தேர்தலில் கலீதா ஜியாவின் கட்சி வலுவான போட்டியாளராகக் கருதப்படுகிறது. இந்த தேர்தலில் அவர், மூன்று இடங்களில் போட்டியிடத் திட்டமிடப்பட்டிருந்தார். ஆனால், தேர்தலுக்கு சில மாதங்களுக்கு முன்பே கலீதா ஜியாவின் உடல்நிலை மோசமடைந்திருப்பது அவருக்குச் சிக்கலை ஏற்படுத்தியுள்ளது. இதற்கிடையே பல ஆண்டுகளாக நாடு கடத்தப்பட்டு லண்டனில் வசிக்கும், அவரது மகனும் பிஎன்பி தலைவருமான தாரிக் ரஹ்மான் கடந்த அக்டோபர் மாதம் நாடு திரும்புவதாகத் தெரிவித்திருந்தார். ஆனால் நவம்பர் பிற்பகுதி வரை, அவர் இன்னும் அந்த நடவடிக்கையை எடுக்கவில்லை. எனினும், வெளிநாட்டிலிருந்தபடியே, உள்ளூர் தலைமையுடன் சேர்ந்து தாரிக் கட்சியை தொடர்ந்து வழிநடத்தி வருகிறார்.