விஜய் கிடைக்காததால் அஜித் ரசிகர்களுக்கு குறி..? அதிமுகவின் வியூகம் என்ன..?

செய்தியாளர் - பிரவீன் ஜோஸ்வா

தமிழ்நாடு அரசியலில் விஜயின் தமிழக வெற்றிக் கழகத்தின் வருகை அரசியல் போக்கையே மாற்றியமைத்துள்ளது. திமுக, அதிமுக என இரு பெரும் கட்சிகளுக்கு இணையாக தவெகவின் நிகழ்ச்சிகளுக்கு பொதுமக்கள் வருகை தருவது அக்கட்சியை முக்கியத்துவம் வாய்ந்த கட்சியாக மாற்றியுள்ளது.

திமுக கூட்டணியில் தவெகவை முன்வைத்து காங்கிரஸ் நடத்திய பேச்சுவார்த்தை அகில இந்திய அளவில் கவனம் ஈர்த்தது. இது ஒரு பக்கம் என்றால் மறுபக்கம் அதிமுகவில் கூட்டணியில் தவெக இணையும் என்றே ஆரம்பத்தில் பேசப்பட்டது.

அதிலும் கரூர் சம்பவத்துக்கு பின்னர் அதிமுக தலைவர்கள் வெளிப்படையாகவே தவெகவுக்கு ஆதரவாக கருத்து தெரிவித்தனர். அதோடு சட்டமன்றத்திலேயே விஜய்க்கு ஆதரவாக குரல்கொடுத்தனர். மேலும் அதிமுக கூட்டத்தில் தவெக கொடிகளும் பறந்த நிலையில், அக்கட்சியின் பொதுச்செயலாளர் பழனிசாமி, கூட்டணிக்கு பிள்ளையார் சுழி போட்டு விட்டதாகவே கருத்து தெரிவித்தார்.

ஆனால் அதன் பின்னர் தவெக கூட்டத்தில் முதலமைச்சர் வேட்பாளர் விஜய்தான் என அறிவித்த நிலையில், விஜய் அதிமுகவோடு சேரமாட்டார் என்பது உறுதியானது. அதனைத் தொடர்ந்து எடப்பாடி பழனிசாமி மற்றும் அதிமுக நிர்வாகிகள் விஜயை கடுமையாக விமர்சிக்கத்தொடங்கினர்.

இந்த சூழலில், தற்போது எடப்பாடி பழனிசாமியின் பிரச்சார கூட்டத்தில் அவருக்கு சில இளைஞர்கள் நடிகர் அஜித்தின் படத்தை கொடுக்கும் நிகழ்வுகள் நடந்து வருகிறது. மேலும் அதிமுக முன்னாள் அமைச்சர்களின் நிகழ்ச்சியிலும் இதுபோன்ற நிகழ்வுகள் தொடர்ந்து வருகிறது. சமீபத்தில் அதிமுக முன்னாள் அமைச்சர் எஸ்.பி.வேலுமணி நடிகர் அஜித் குமாரின் ரசிகர் மன்ற நிர்வாகிகளையும், ரசிகர்களையும் நேரடியாகச் சந்தித்து அவர்களுடன் கலந்துரையாடி அவர்களின் ஆதரவுகளை கோரினார். இதனால் விஜயால் ஏற்படும் இழப்பை அஜித் ரசிகர்களை கவர்வது மூலம் ஈடுகட்ட அதிமுக முடிவு செய்துள்ளதா என்ற கேள்வி எழுந்துள்ளது.

இது குறித்து புதிய தலைமுறை சார்பில் அதிமுகவின் மூத்த தலைவரும் முன்னாள் அமைச்சருமான ராஜேந்திர பாலாஜியிடம் கேள்வி எழுப்பப்பட்டது. அதற்கு பதிலளித்த அவர், அஜித் ரசிகர்கள் 90 சதவீதம் அதிமுகவில்தான் இருக்கிறார்கள் என்றும், அவர்கள்தான் எடப்பாடி பழனிசாமியிடம் வந்து அஜித்தின் படத்தை கொடுக்கிறார்கள் என்று கூறியுள்ளார்.

ராஜேந்திர பாலாஜியின் பதில் குறித்து தவெக நிர்வாகி நிர்மல்குமாரிடம் கேட்டபோது அதிமுக தலைவர்கள் குழப்பத்தில் இருக்கிறார்கள் என பதிலளித்தார்.