"யார் யாரோ கனவு காண்கிறார்கள்.. கனவை நொறுக்கிவிட்டீர்கள்" - செங்கோட்டையன் சொந்த தொகுதியில் பழனிசாமி

கோபிசெட்டிப்பாளையம் தொகுதி நல்லகவுண்டன்பாளையத்தில் அமைந்துள்ள முத்துமஹால் திருமண மண்டபத் திடலில் அதிமுக பொதுச்செயலாளர் பழனிசாமி மேற்கொள்ளும் எழுச்சிப்பயணத்தின் ஒரு பகுதியாக சிறப்புப் பொதுக்கூட்டம் இன்று நடைபெற்றது. இந்தக் கூட்டத்தில் பழனிசாமி என்ன பேசப்போகிறார் என்பது பேசுபொருளாக இருந்தது. ஏனெனில் செங்கோட்டையன் அதிமுகவில் இருந்து நீக்கப்பட்டபின் முதன்முறையாக எடப்பாடி பழனிசாமி பரப்புரை மேற்கொண்டார். அவருக்கு அதிமுக தொண்டர்கள் சார்பாக உற்சாக வரவேற்பு அளிக்கப்பட்டது.

பொதுக்கூட்டத்தில் பேசிய எடப்பாடி பழனிசாமி, “2026 தேர்தலில் அதிமுக தலைமையிலான கூட்டணி பெரும்பான்மையான இடங்களில் வெற்றி பெறும். அதில் கோபிச்செட்டிப்பாளையம் தொகுதியில் அதிக வாக்குகள் வித்தியாசத்தில் வெற்றி பெறுவோம். கோபிசெட்டிபாளையம் நகரமே அதிரும் அளவிற்கு மக்கள் வெள்ளம் கடல்போல் காட்சி அளிக்கிறது. உங்களுடைய ஆரவாரம் வரும் சட்டமன்றத் தேர்தலில், கோபியில் அதிமுக வேட்பாளர் வெற்றி பெற்றுவிட்டார் என்பதை காட்டுகிறது. யார் யாரோ கனவு கண்டு கொண்டிருக்கிறார்கள். அந்தக் கனவை நொறுக்கிவிட்டீர்கள். இந்தத் தொகுதியில் ஒருவர் எம்எல்ஏவாக இருந்தார். நீங்கள் ஓட்டு போட்டு தேர்ந்தெடுக்கப்பட்டவர். ஓட்டு வாங்குவதற்கு உங்களை வந்து அணுகினார். ஆனால் ராஜினாமா செய்வதற்கு உங்களை கேட்டாரா?

அதிமுக ஆட்சி மலர்ந்த பிறகு கோபிசெட்டிபாளையம் தொகுதி எடப்பாடி தொகுதிக்கு மேல் வளரும். தமிழகத்தில் முதன்மையான தொகுதியாக கோபிசெட்டிபாளையம் தொகுதி வருவதற்கு நடவடிக்கை எடுக்கப்படும். அதிமுகவிற்கு யாரெல்லாம் துரோகம் செய்தார்களோ அவர்களை ஆண்டவர் பார்த்துக்கொள்வார்.

அத்திக்கடவு அவிநாசி திட்டத்திற்கான நிகழ்ச்சியில் பல்வேறு கட்சியை சேர்ந்தவர்கள் பங்கேற்றனர். ஆனால் இந்தத் தொகுதியைச் சேர்ந்த எம்எல்ஏ பங்குபெறவில்லை. அதில் எம்ஜிஆர், ஜெயலலிதா படங்கள் இல்லை என்பதால் கூட்டத்தில் பங்கேற்கவில்லை என அவர் காரணம் சொன்னார். ஆனால் இப்போது யார் படத்தை வைத்துக்கொண்டு மாற்றுக் கட்சியில் சேர்ந்தீர்கள்? உங்களுக்கு அடையாளம் கொடுத்தது அதிமுக. பதவி கொடுத்தது அதிமுக” எனத் தெரிவித்தார்,.

’மக்களைக் காப்போம் தமிழகத்தை மீட்போம்’ எழுச்சிப்பயணத்தை இதுவரை 174 சட்டமன்றத் தொகுதிகளில் நடத்தியிருக்கிறார் எடப்பாடி பழனிசாமி. 64 நாட்களில் சுமார் 11 ஆயிரம் கிலோ மீட்டர் பயணித்து 34 மாவட்டங்களில் மக்களை சந்தித்திருக்கிறார்.

50 ஆயிரம் பேர் வரை கலந்துகொள்ள ஏற்பாடு செய்திருந்த இப்பொதுக் கூட்டத்தில் பழனிசாமி என்ன பேசப்போகிறார் என்பதுதான் அரசியல் ரீதியாக உற்று நோக்கப்பட்டது. ஏனென்றால், அதிமுகவில் இருந்து தேர்ந்தெடுக்கப்பட்ட செங்கோட்டையன் இப்போது வேறு கட்சிக்குத் தாவி, எம்.எல்.ஏ. பதவியை ராஜினாமா செய்துவிட்டதால், இந்த தொகுதி எம்.எல்.ஏ. இல்லாததாக மாறியுள்ளது.

இந்த தொகுதியில் இரட்டை இலை சின்னத்தில் 10 முறை தேர்தலில் போட்டியிட்டு, 9 முறை வெற்றி பெற்றவர் செங்கோட்டையன். அதிலும் 8 முறை கோபிச்செட்டிப்பாளையம் தொகுதியில் மட்டுமே போட்டியிட்டு வென்றிருக்கிறார். அப்படியிருக்கும் சூழலில் அதிமுகவை அழிப்பேன் என்றும் ஊழல் ஆட்சி என்றும் பேசியிருப்பது விமர்சனத்துக்கு உள்ளாகியிருக்கிறது. திமுகவின் பி டீம் என்று செங்கோட்டையனை இபிஎஸ் கூறியிருந்தார். அது உண்மை என்பதை நிரூபிக்கும் வகையில் சேகர்பாபுவிடம் ஆலோசனை நடத்திவிட்டு புதிய கட்சிக்குத் தாவியிருக்கிறார் என அதிமுகவினர் விமர்சித்து வருகின்றனர். அதேவேளையில் செங்கோட்டையன் இணைப்புக்காகக் குரல் கொடுக்கவில்லை, தனது சுயநலத்துக்காகவே போர்க்கொடி தூக்கினார் என்பதை அறிந்தே எடப்பாடி பழனிசாமி அவரை கட்சியிலிருந்து நீக்கியிருப்பதாக அதிமுகவினர் தெரிவிக்கின்றனர்.