2025-ன் சக்திவாய்ந்த நாடுகள்! ஜப்பானைப் பின்னுக்குத் தள்ளிய இந்தியா.. எத்தனையாவது இடம் தெரியுமா?

உலகின் சக்திவாய்ந்த நாடுகள் குறித்த தரவரிசைப் பட்டியல் ஒவ்வொரு ஆண்டும் பல்வேறு சர்வதேச அமைப்புகளால் வெளியிடப்பட்டு வருகிறது. ஒரு நாட்டின் பொருளாதார வலிமை, ராணுவத் திறன், மக்களின் வாழ்வாதாரம் மற்றும் உலக அரங்கில் அதன் பங்களிப்பு ஆகியவற்றை அடிப்படையாகக் கொண்டே இந்தப் பட்டியல்கள் தயாரிக்கப்படுகின்றன. அந்த வகையில், ஆஸ்திரேலியாவைத் தளமாகக் கொண்ட 'லோவி இன்ஸ்டிடியூட்' (Lowy Institute) என்ற குழு, சமீபத்தில் 2025-ம் ஆண்டுக்கான 'ஆசிய சக்தி குறியீடு' (Asia Power Index 2025) என்ற பெயரில் உலகின் தலைசிறந்த நாடுகள் பட்டியலை வெளியிட்டுள்ளது.

இந்த அறிக்கை, ஒரு நாட்டின் ஆதிக்கத்தை மதிப்பிடுவதற்காக, பொருளாதாரத் திறன், ராணுவத்திறன், நிலைத்தன்மை, எதிர்கால வளங்கள், பொருளாதார உறவுகள், பாதுகாப்பு வலையமைப்புகள், ராஜதந்திர செல்வாக்கு மற்றும் கலாசார செல்வாக்கு ஆகிய எட்டு முக்கிய காரணிகளை அடிப்படையாகக் கொண்டுள்ளது. வெளியிடப்பட்டுள்ள இந்த சக்திக் குறியீட்டில், வல்லரசு நாடான அமெரிக்கா 80.4 புள்ளிகளுடன் தொடர்ந்து முதல் இடத்தைப் பிடித்துள்ளது. அதனைத் தொடர்ந்து, அண்டை நாடான சீனா 73.7 புள்ளிகளுடன் இரண்டாம் இடத்தில் நீடிக்கிறது.

இந்தக் குறியீட்டின்படி, இந்த இரு நாடுகளும் 'மிக சக்திவாய்ந்த நாடுகள்' என வகைப்படுத்தப்பட்டுள்ளன. இந்த ஆண்டுக்கான பட்டியலில், இந்தியா ஒரு புதிய மைல்கல்லை எட்டியுள்ளது. 40 புள்ளிகளுடன் இந்தியா மூன்றாவது இடத்தைப் பிடித்து, முந்தைய இடத்தில் இருந்த ஜப்பான் நாட்டைப் பின்னுக்குத் தள்ளி முன்னேறியுள்ளது. இதன் மூலம், ஆசியப் பிராந்தியத்தில் இந்தியா ஒரு 'முக்கிய சக்திவாய்ந்த நாடாக' (Major Power) உருவெடுத்துள்ளதுடன், முதல் முறையாக ஒட்டு மொத்தமாக 40 புள்ளிகள் என்ற எல்லையையும் தாண்டியுள்ளது. இந்தியாவுக்கு அடுத்தபடியாக ஜப்பான் 38.8 புள்ளிகளுடன் நான்காம் இடத்திலும், ரஷ்யா 32.1 புள்ளிகளுடன் ஐந்தாம் இடத்திலும் உள்ளன. இந்த நாடுகள் 'நடுத்தர சக்திவாய்ந்த நாடுகள்' (Middle Powers) என வகைப்படுத்தப்பட்டுள்ளன.

உலகின் முக்கிய சக்திவாய்ந்த நாடாக இந்தியா முன்னேற்றம் கண்டதற்குப் பல காரணிகள் முக்கியப் பங்காற்றியுள்ளன என லோவி இன்ஸ்டிடியூட் சுட்டிக்காட்டியுள்ளது. நாட்டின் பொருளாதார மீட்சி மற்றும் நிலையான பொருளாதாரத் திட்டமிடல் ஆகியவை உலக அரசியலில் இந்தியாவிற்கான முக்கியத்துவத்தை அதிகரித்துள்ளது. மேலும், அதிகரித்த ராணுவத் திறனானது, குறிப்பாக 'ஆபரேஷன் சிந்துருக்குப்' பிறகு, இந்தியாவின் ராணுவத் திறன் மற்றும் திட்டமிடலுக்கு அதிக சக்தி மதிப்பெண்ணைப் பெற்றுத் தந்துள்ளது.

சர்வதேச அரங்கில் இந்தியாவின் ராஜதந்திர செல்வாக்கு மற்றும் அரசியல் முக்கியத்துவம் ஆகியவை இந்த முன்னேற்றத்திற்கு மேலும் வலுசேர்த்துள்ளன. எனினும், இந்தியா மூன்றாவது இடத்துக்கு முன்னேறியிருந்தாலும், இரண்டாவது இடத்தில் உள்ள சீனாவுக்கும் (73.7 மதிப்பெண்கள்), இந்தியாவுக்கும் (40 மதிப்பெண்கள்) இடையிலான சக்தி மதிப்பெண் இடைவெளி மிகப்பெரியதாக உள்ளது. இதன் மூலம், ஆசியாவில் ஆதிக்கம் செலுத்தும் வலிமை மிக்க நாடாகச் சீனா தன்னைத் தொடர்ந்து நிலைநிறுத்தியுள்ளது.