”திரைக்கதை அரசியலும், வெற்று விளம்பரங்களும் தோற்றுப்போனது” - நயினார் நாகேந்திரன் விமர்சனம்!!

தமிழ்நாட்டில் வடகிழக்கு பருவமழை கடந்த அக்டோபர் 15-ம் தேதி தொடங்கியிருக்கும் நிலையில், சென்னை உட்பட பல மாவட்டங்களில் கனமழை வெளுத்து வாங்கி வருகிறது. குறிப்பாக, நேற்று இரவு சென்னை மற்றும் அதன் புறநகர் பகுதி பெய்த அதிகனமழை காரணமாக பல இடங்களில் தண்ணீர் தேங்கியது. இந்நிலையில், அமைச்சர்கள் மற்றும் அதிகாரிகளுடன் கனமழையால் பொதுமக்களுக்கு பாதிப்புகள் ஏற்படாமல் தடுப்பது, மழைநீரை விரைந்து வெளியேற்றுவது உள்ளிட்ட முன்னெச்சரிக்கை நடவடிக்கைகள் குறித்து முதலமைச்சர் விஜய் ஆலோசனை நடத்தியிருக்கிறார்.

இந்தச்சூழலில் தான், முதல் மழைக்கே சென்னையை தத்தளிக்க விட்டிருப்பது முதல்வர் விஜய் தலைமையிலான தவெக அரசின் திறனின்மையை காட்டுகிறது என பாஜக மாநிலத் தலைவர் நயினார் நாகேந்திரன் விமர்சித்துள்ளார்.

இதுகுறித்து அவர் வெளியிட்டுள்ள பதிவில், ”வானிலை மையம் முன்கூட்டியே எச்சரித்தும் உரிய நடவடிக்கை எடுக்காததால், நேற்று இரவு பெய்த ஒருநாள் மழைக்கே சென்னை மற்றும் புறநகர்ப் பகுதிகள் வெள்ளக்காடாக மாறியிருப்பது முதலமைச்சர் ஜோசப் விஜய் தலைமையிலான த.வெ.க. அரசின் ஒட்டுமொத்த நிர்வாகத் தோல்வியாகும். பன்னாட்டு விமான நிலையம், ஜி.எஸ்.டி சாலை, கணேசபுரம் சுரங்கப்பாதை என பிரதான வழிகள் முடங்கி, தாம்பரம் உள்ளிட்ட பகுதிகளில் கார்கள் தண்ணீரில் மூழ்கி மக்கள் தத்தளிப்பது, அரசு இயந்திரம் செயலிழந்துவிட்டதையே காட்டுகிறது.

"மாற்றத்திற்கான அரசு" என வாய்ஜாலம் பேசிய ஜோசப் விஜயின் அரசு, மழைநீர் வடிகால் பணிகளிலும் தூர்வாரலிலும் காட்டிய அலட்சியமே இந்தப் பேரழிவுக்கு முழுமுதற் காரணமாகும். வடிகால்கள் தூர்வாரப்பட்டுவிட்டன, ராட்சத மோட்டார்கள் தயார் எனக் காகிதத்தில் கணக்கு காட்டி மக்களின் பல கோடி ரூபாய் வரிப்பணத்தை வீணடித்ததே தவிர, மழைநீரை வடியவைக்கக் களத்தில் எந்தவொரு உருப்படியான முன்னெச்சரிக்கை நடவடிக்கையும் எடுக்கப்படவில்லை. ஆட்சி நிர்வாகம் என்பது திரையில் பேசும் பஞ்ச் வசனங்களோ, விளம்பர உத்திகளோ அல்ல; களத்தில் நின்று மக்களின் துயர் துடைக்கும் கடமை என்பதை முதலமைச்சர் ஜோசப் விஜய் உணர வேண்டும்.

மக்கள் வெள்ளத்தில் கண்ணீர் வடிக்கும்போது மௌனம் காக்காமல், தேங்கியுள்ள மழைநீரை அகற்றவும், அடுத்தடுத்த நாட்களில் எதிர்பார்க்கப்படும் பெருமழையை எதிர்கொள்ளத் தேவையான முன்னேற்பாடுகளைச் செய்யவும், துரித நிவாரணங்களை வழங்கவும் தவெக அரசு உடனடியாகப் போர்க்கால அடிப்படையில் நடவடிக்கை எடுக்க வேண்டும்; இல்லையேல், மக்களின் கடுமையான கோபத்திற்கு ஆளாக நேரிடும் எனத் தெரிவித்துக் கொள்கிறேன்” எனத் தெரிவித்துள்ளார்.