மாற்றப்பட்ட வடிவேல் ராவணன்... புதிய பொதுச்செயலாளராக முரளிசங்கர்.. பாமகவில் என்னதான் நடக்கிறது?

பாமக பொதுச் செயலாளராக முரளி சங்கரை நியமித்து உத்தரவிட்டுள்ளார் பாமக நிறுவனர் மருத்துவர் ராமதாஸ். ஏற்கெனவே அந்தப் பதவியில் இருந்த வடிவேல் ராவணனை மாற்றிவிட்டு, முரளிசங்கரை நியமித்திருக்கிறார். பாமக கட்சி விதியின்படி பட்டியல் சமூகத்தைச் சேர்ந்த ஒருவர்தான் பொதுச் செயலாளர் பதவி வகிக்க முடியும். அந்தவகையில் முரளி சங்கர் நியமிக்கப்பட்டிருக்கிறார். நடப்பது என்ன? விரிவாகப் பார்ப்போம்.

பாட்டாளி மக்கள் கட்சியில் நிறுவனத் தலைவர் மருத்துவர் ராமதாசுக்கும், அன்புமணி ராமதாசுக்கும் இடையே மோதல் போக்கு நீடித்து வருகிறது. சமாதானம் இன்றோ, நாளையோ எட்டிவிடும் என்று நிர்வாகிகள் எதிர்பார்த்து காத்திருக்கும் நிலையில், பிரச்னை தீர்ந்தபாடில்லை. இதனிடையே, கடைசிவரை நானே தலைவராக நீடிப்பேன் என அறிவித்தார் மருத்துவர் ராமதாஸ்.

இது ஒருபுறமிருக்க, மாநிலப் பொருளாளர், துணைத்தலைவர், மாவட்ட தலைவர், மாவட்டச் செயலாளர் என பலரையும் மாற்றி வருகிறார் மருத்துவர் ராமதாஸ். பொருளாளராக இருந்த திலகபாமாவை நீக்கிவிட்டு சையத் மன்சூர் உசேனை அந்தப் பொறுப்பில் நியமித்தார். பாமகவின் மாநில துணை தலைவராக முன்னாள் எம்.எல்.ஏ ரவிராஜ் மற்றும் சமூக நீதி பேரவை தலைவராக இருந்த பாலு போன்றோர் நீக்கப்பட்டு வழக்கறிஞர் கோபுவையும், மாநில தேர்தல் பணிக்குழு செயலாளராக பூபால கண்ணனையும் நியமித்தார். அந்தவரிசையில் தற்போது, பொதுச்செயலாளர் வடிவேல் ராவணனை நீக்கிவிட்டு முரளிசங்கரை நியமித்திருக்கிறார்.

வடிவேல் ராவணன் நீண்டகாலமாக பாமகவில் பயணித்து வருபவர். மருத்துவர் ராமதாஸுக்கும் அன்புமணிக்கும் இடையே மோதல் வெடித்தபோது முதலில் ராமதாஸ் உடனே இருந்தார் வடிவேல் ராவணன். அன்புமணியை மருத்துவர் ராமதாஸ் தலைவர் பதவியில் இருந்து நீக்கியதற்கு திலகபாமா தனது அதிருப்தியைத் தெரிவித்திருந்த போது கூட, அதைக் கண்டித்துகூட மருத்துவர் ராமதாஸுக்கு ஆதரவாக அறிக்கை வெளியிட்டார் வடிவேல் ராவணன். ஆனால், தற்போது அன்புமணியின் ஆதரவாளராக இருக்கிறார். சமீபத்தில், ஒரு பத்திரிகையாளர் சந்திப்பில்கூட, கட்சியின் பொதுச் செயலாளரைக் காணவில்லை. அவரைக் கண்டுபிடித்துத் தருவோருக்கு 100 ரூபாய் கொடுக்கலாமா என ராமதாஸ் கிண்டலாகப் பேசினார். இந்தநிலையில் இன்று அவர் மாற்றப்பட்டிருக்கிறார்.

தற்போது நியமிக்கட்டுள்ள முரளிசங்கர் கடந்த பத்தாண்டுகளாக பாமகவில் பயணிப்பவர். கடந்த 2024 நாடாளுமன்றத் தேர்தலில், விழுப்புரம் தொகுதியில் போட்டியிட்டு 1 லட்சத்து 80 ஆயிரம் வாக்குகளைப் பெற்றார். பல மொழிகளை சரளமாக பேசக்கூடிய முரளிசங்கர் தற்போது, பாமக மாணவரணியின் செயலாளராக இருந்துவருகிறார்.

தனது பத்தாவது வயதிலிருந்து Liverpool Football Club-இன் தீவிர ரசிகரான முரளி சங்கர், 17 வயதில் பள்ளிகளுக்கிடையேயான மாவட்டம் மற்றும் மாநில அளவிலான போட்டிகளில் பங்கேற்றுள்ளார். அதன் பிறகு, தலைநகர் டெல்லியில் முதுகலை படிப்பு படிக்கும்போது, Delhi Kop FC-க்காக விளையாடியுள்ளார். பின்னர், பிரெஞ்சு கால்பந்து கிளப்பில் முக்கிய பதவி வகித்திருக்கிறார்.

அரசியலில் இருந்த ஆர்வத்தால், 2015ஆம் ஆண்டு சொந்த ஊர் திரும்பிய முரளி சங்கர், சில மாதங்களிலேயே பாமகவின் அரசியல் பணியால் ஈர்க்கப்பட்டு, அக்கட்சியில் சேர்ந்தார். 2016ஆம் ஆண்டே அவருக்கு அரூர் தொகுதியில் பாமக வேட்பாளராக போட்டியிடும் வாய்ப்பும் கிடைத்தது. ஆனால், அத்தேர்தலில் தோல்வியடைந்தார். அதன் தொடர்ச்சியாக, 2021ஆம் ஆண்டு வந்தவாசி சட்டமன்றத் தொகுதியில் பாமக வேட்பாளராக போட்டியிட்டார். 2024 தேர்தலில், விழுப்புரம் தொகுதியில் போட்டியிட்டார்.

சமீபத்தில் பத்திரிகையாளர் சந்திப்பில், முரளிசங்கரின் மகள் செம்மலர் மருத்துவர் ராமதாஸுக்கு ஆறுதல் சொன்ன வீடியோ சமூக வலைதளங்களில் வெளியானது. இந்தநிலையில், தற்போது முரளிசங்கர் பொதுச் செயலாளராக அறிவிக்கப்பட்டிருக்கிறார்.