கும்பகோணம்| சுவர் இடிந்து விழுந்து 20 வயது இளம்பெண் உயிரிழப்பு.. 3 பேர் மருத்துவமனையில் அனுமதி!

தென்மேற்கு வங்கக்கடலில் உருவான டிட்வா புயலானது, இலங்கையில் மிகப்பெரிய பேரழிவை ஏற்படுத்திவிட்டு தமிழகத்தை நெருங்கியுள்ளது.. இலங்கையில் கிட்டத்தட்ட 40 மணிநேர பயணத்தை கடந்து வட தமிழக கடற்கரையை டிட்வா புயல் அடைந்துள்ளது..

தற்போதைய நிலவரப்படி டிட்வா புயலானது நாகையில் இருந்து 60 கிலோமீட்டர் தொலைவிலும், சென்னையிலிருந்து தெற்கே 220 கிலோ மீட்டர் தொலைவிலும், புதுச்சேரிக்கு தெற்கே 160 கிலோமீட்டர் தொலைவிலும் மையம் கொண்டுள்ளது..

இந்நிலையில் புயல் காரணமாக தமிழகத்தில் உள்ள அனைத்து மாவட்டங்களிலும் பரவலாக அதிகனமழை முதல் மிக கனமழை வரை பெய்துவருகிறது.. இந்தசூழலில் கும்பகோணம் அருகே வீட்டின் சுவர் இடிந்துவிழுந்து இளம்பெண் ஒருவர் உயிரிழந்துள்ளார்.. மேலும் குடும்பத்தினர் 3 பேர் மருத்துவமனையில் அனுமதிக்கப்பட்டுள்ளனர்..

தஞ்சாவூர் மாவட்டம் கும்பகோணம் அருகே உள்ள ஆலமன்குறிச்சியில் வீட்டின் சுவர் இடிந்து விழுந்ததில் ரேணுகா என்ற 20 வயது இளம்பெண் பரிதாபமாக உயிரிழந்துள்ளார்..

இன்று காலை வீட்டில் தூங்கிக்கொண்டிருந்தபோது சுவர் இடிந்து விழுந்ததில் ரேணுகா சிகிச்சை பலனின்றி உயிரிழந்தார்.. மேலும் அவருடைய தந்தை, தாய் மற்றும் சகோதரி ஆகியோர் படுகாயமடைந்த நிலையில் அரசு மருத்துவமனையில் சிகிச்சைக்காக அனுமதிக்கப்பட்டுள்ளனர்..