இலங்கையில் உணவில்லாமல் தமிழர்கள் மயக்கம்.. 3 நாட்களாக சிக்கித் தவிப்பு!

இலங்கையில் டிட்வா புயல் காரணமாக மோசமான வானிலை நிலவிவரும் நிலையில், கடந்த சில தினங்களாக விமானசேவைகள் நிறுத்திவைக்கப்பட்டுள்ளன. இந்தசூழலில், துபாயில் இருந்து இலங்கை வழியாக இந்தியா வரவிருந்த 150 தமிழர்கள் உட்பட 300 பேர் இலங்கையின் கொழும்பு விமான நிலையத்தில் சிக்கித்தவித்து வருகின்றனர். டிட்வா புயல் காரணமாக சென்னைக்கு விமானங்கள் இயக்கப்படாததால் 3 நாட்களாக உணவு உள்ளிட்ட அடிப்படை வசதிகள் கூட இல்லாமல் பயணிகள் தவித்து வருகின்றனர்.

இதையடுத்து, இலங்கையில் சிக்கியுள்ள தமிழர்களை பாதுகாப்பாக அழைத்துவர நடவடிக்கை எடுக்கப்படும் எனவும், இலங்கையில் மின்சாரம் துண்டிக்கப்பட்டுள்ளதால் பலரை தொடர்பு கொள்ள முடியவில்லை எனவும் அமைச்சர் நாசர் தெரிவித்திருந்தார்.

இந்நிலையில், இலங்கை விமான நிலையத்தில் சிக்கித் தவித்துக் கொண்டிருக்கும் தமிழகப் பயணி ஞானியார் என்பவர் புதியதலைமுறைக்கு பேட்டி அளித்துள்ளார். அதில், துபாயில் இருந்து கொழும்பு வந்தோம். அப்போது, டிட்வா புயல் காரணமாக அங்கிருந்து, எங்களை ராஜபக்சே விமான நிலையத்திற்கு மாற்றியிருக்கிறார்கள்.

ஏர்போட்டில் இருந்து எங்களுக்கு எந்த உதவியும் கிடைக்கவில்லை. உணவு கூட சரியாக கொடுக்கப்படவில்லை. குழந்தைகள், பெரியவர்கள் என நிறைய பேர் தூங்காமல், உணவு இல்லாமல் மூன்று நாட்களாக இருக்கின்றனர். ஒருவர் கூட தரையில் கூட அமர்ந்து தர்ணா போராட்டத்தில் ஈடுபட்டு வருகிறார். ஆனால், அவரையும் கூட யாரும் கண்டுகொள்ளவில்லை.

இதுவரை, இந்திய தூதரகத்திலிருந்தும் எங்களுக்கு இன்னும் உதவி கிடைக்கவில்லை. இந்திய தூதரகத்திலிருந்து யாராவது வந்து இங்கு இருக்கும் பயணிகளை ஒருங்கிணைத்து உதவி செய்தால் நன்றாக இருக்கும்” எனத் தெரிவித்திருந்தார்.

இந்தசூழலில் இலங்கையின் கொழும்பு விமான நிலையத்தில் சிக்கியுள்ளவர்களில், தமிழர்கள் உட்பட 7 பேர் மயக்கமடைந்ததாக தகவல் கிடைத்துள்ளது. அவர்களுக்கு முதலுதவி சிகிச்சை அளிக்கப்பட்டுள்ளது.

இதனிடையே அங்கு சிக்கியுள்ளவர்கள், போதுமான உணவு வழங்கப்படவில்லை எனவும், குழந்தைகளுக்கு பால் கிடைக்கவில்லை எனவும், தங்க இடமில்லாமல் தவிப்பதாகவும் வேதனை தெரிவித்துள்ளனர்.