அருப்புக்கோட்டை: 43 வயது பெண்ணுக்கு கூட்டு பாலியல் வன்கொடுமை.. 6 பேருக்கு ஆயுள் தண்டனை!
விருதுநகர் மாவட்டம் அருப்புக்கோட்டையில் 43 வயது பெண்ணை கடத்தி கூட்டு பாலியல் வன்கொடுமை செய்த 6 பேருக்கு, ஶ்ரீவில்லிபுத்தூர் விரைவு மகளிர் நீதிமன்றம் ஆயுள் சிறை மற்றும் தலா ரூ.70 ஆயிரம் அபராதம் விதித்தது. குற்றவாளிகளில் ஒருவரான பிரபாகரன் பல்வேறு குற்றங்களில் தொடர்புடையவர் என்பதும் குறிப்பிடத்தக்கது.
விருதுநகர் மாவட்டம் அருப்புக்கோட்டையை சேர்ந்த 43 வயது பெண் கடந்த 2022-ம் ஆண்டு ஆகஸ்ட் 22-ம் தேதி உறவினர் வீட்டு திருமண நிகழ்ச்சிக்கு சென்று விட்டு, உறவினருடன் காரில் ஊர் திரும்பினார்.
பாலவநத்தம் - கோபாலபுரம் சாலையில் இயற்கை உபாதை கழிக்க இறங்கிய போது, அங்கு வந்த கும்பல் உறவினரை தாக்கி விட்டு, பெண்ணை கடத்தி சென்று கூட்டு பாலியல் வன்கொடுமை செய்ததுடன், நகை மற்றும் செல்போனை பறித்து சென்றனர்.
இது குறித்து அப்பெண் அளித்த புகாரின் பேரில் அருப்புக்கோட்டை தாலுகா போலீஸார் வழக்கு பதிவு செய்து, கோவிலாங்குளத்தைச் சேர்ந்த சீனிவாசன், மதுரையை சேர்ந்த போராளி பிரபாகரன், விஜய், ராம்குமார், ஜெயக்குமார், கல்லூரி மாணவர் அழகு முருகன் ஆகிய 6 பேரை கைது செய்தனர். இந்த 6 பேர் மீதான வழக்கு விசாரணை ஶ்ரீவில்லிபுத்தூரில் உள்ள விரைவு மாவட்ட மகளிர் நீதிமன்றத்தில் நடைபெற்று வந்தது.
6 பேருக்கு ஆயுள் தண்டனை..
நீதிமன்ற விசாரணை நிறைவுபெற்ற நிலையில் இன்று தீர்ப்பை வாசித்த நீதிபதி புஷ்பராணி, குற்றஞ்சாட்டப்பட்ட அனைவரையும் குற்றவாளி என அறிவித்தார்.. குற்றவாளியான 6 பேருக்கும் ஆயுள் காலம் முழுவதும் சிறை தண்டனை மற்றும் தலா ரூ.70 ஆயிரம் அபராதம் விதித்து தீர்ப்பளித்தார்.
இந்த வழக்கின் குற்றவாளிகளில் ஒருவரான போராளி பிரபாகரன் என்பவர் கடந்த ஜூன் மாதம் நள்ளிரவில் வே.சத்திரப்பட்டி காவல் நிலையத்தில் இருந்த தலைமை காவலரை அறையில் அடைத்து வைத்துவிட்டு காவல் நிலையத்தை சூறையாடி சென்றவர் என்பதும், ஆணவ கொலை உள்ளிட்ட பல்வேறு குற்ற சம்பவங்களில் தொடர்புடையவர் என்பதும் குறிப்பிடத்தக்கது.
