ஹோபார்ட்டில் ஹீரோவான வாசிங்டன்.. ஆஸி மண்ணில் இந்தியா வரலாற்று வெற்றி! ஆட்டநாயகன் அர்ஷ்தீப் சிங்!

2026 டி20 உலகக்கோப்பை தொடரானது எதிர்வரும் பிப்ரவரி மற்றும் மார்ச் மாதங்களில் இந்தியா மற்றும் இலங்கையில் நடக்கவிருக்கிறது.. மிகப்பெரிய தொடருக்கு இன்னும் 3 மாதங்களே உள்ள நிலையில், ஆஸ்திரேலியாவிற்கு எதிராக 5 டி20 போட்டிகள் கொண்ட தொடரில் இந்தியா விளையாடிவருகிறது..

முதல் டி20 போட்டி மழையால் கைவிடப்பட்ட நிலையில், இரண்டாவது டி20 போட்டியில் ஆஸ்திரேலியா அசத்தலான வெற்றியை பதிவுசெய்தது..இந்தசூழலில் ஹோபார்ட் மைதானத்தில் நடந்துவரும் 3வது டி20 போட்டியில் இந்தியா-ஆஸ்திரேலியா மோதின..

பரபரப்பாக தொடங்கிய போட்டியில் ஆஸ்திரேலியா அணி முதலில் பேட்டிங் செய்தது. சிறப்பாக பந்துவீசிய அர்ஷ்தீப் சிங் தொடக்கத்திலேயே டிராவிஸ் ஹெட், ஜோஸ் இங்கிலீஸ் விக்கெட்டை வீழ்த்த 14 ரன்களுக்கு 2 விக்கெட்டுகளை இழந்து ஆஸ்திரேலியா தடுமாறியது. தொடர்ந்து ஒரே ஓவரில் 2 விக்கெட்டுகளை வருண் சக்கரவர்த்தி வீழ்த்த 73 ரன்களுக்கு 4 விக்கெட்டை இழந்தது ஆஸ்திரேலியா..

ஆனால் மறுமுனையில் 8 பவுண்டரிகள் 5 சிக்சர்கள் என பறக்கவிட்ட டிம் டேவிட் 74 ரன்கள் குவித்து அசத்த, 8 பவுண்டரிகள் 2 சிக்சர்கள் என விளாசிய ஸ்டொய்னிஸ் 64 ரன்கள் அடிக்க 20 ஓவரில் 186 ரன்கள் குவித்தது.. சிறப்பாக பந்துவீசிய அர்ஷ்தீப் சிங் 4 ஓவரில் 35 ரன்கள் குடுத்து 3 விக்கெட்டுகளை வீழ்த்தி அசத்தினார்.

187 ரன்கள் என்ற இலக்கை நோக்கி விளையாடிய இந்திய அணிக்கு எதிராக ஆஸ்திரேலியா நெருக்கடி கொடுத்தது. ஆனால் மிடில் ஆர்டர் வீரராக வந்த வாசிங்டன் சுந்தர் 4 சிக்சர்கள் 3 பவுண்டரிகளை பறக்கவிட்டு 213 ஸ்டிரைக் ரேட்டுடன் 23 பந்தில் 49 ரன்கள் அடித்து அசத்தினார். வாசிங்டனின் அதிரடியால் இந்திய அணி 5 விக்கெட்டுகள் வித்தியாசத்தில் வெற்றிபெற்று தொடரை 1-1 என சமன்செய்துள்ளது..

போட்டி நடைபெற்ற ஹோபார்ட் மைதானத்தில் முதல்முறையாக டி20 போட்டியில் தோல்வியை தழுவியது ஆஸ்திரேலியா அணி. முதலிரண்டு போட்டிகளில் பெஞ்சில் அமரவைக்கப்பட்ட அர்ஷ்தீப் சிங், 3வது போட்டியில் சிறப்பாக செயல்பட்டு ஆட்டநாயகன் விருதை வென்றதோடு ஒரு வரலாற்று வெற்றிக்கும் இந்தியாவை அழைத்துச்சென்றார்.