2026 T20 WC| 8ஆம் வரிசை வரை பேட்டிங்.. 7 பவுலிங் ஆப்சன்.. இந்தியாவின் பிளேயிங் 11 இதுதான்!

2026 டி20 உலகக்கோப்பை தொடரானது வரும் பிப்ரவரி 7 முதல் மார்ச் 8ஆம் தேதி வரை இந்தியா மற்றும் இலங்கையில் நடைபெறவிருக்கிறது. 20 அணிகள் கோப்பைக்காக பலப்பரீட்சை நடத்தவிருக்கும் நிலையில், ஐந்து ஐந்து அணிகளாக 4 பிரிவுகள் பிரிக்கப்பட்டுள்ளன.

குரூப் ஏ பிரிவில் பாகிஸ்தான், நமீபியா, நெதர்லாந்து மற்றும் அமெரிக்கா முதலிய அணிகளுடன் இந்தியா இடம்பெற்றுள்ளது. முதல் போட்டியில் அமெரிக்காவையும், பிப்ரவரி 15ஆம் தேதி பாகிஸ்தானையும் எதிர்கொள்கிறது இந்திய அணி.

இந்தசூழலில் உலகக்கோப்பைக்கு இன்னும் ஒரு மாதமே இருக்கும் நிலையில், 2026 டி20 உலகக்கோப்பைக்கான இந்திய அணி அறிவிக்கப்பட்டுள்ளது.

இந்திய டி20 அணியில் சுப்மன் கில்லும், ஜிதேஷ் சர்மாவும் இடம்பெற்றிருந்த போது அணியில் சமநிலை இல்லாமல் இருப்பதாகவே இருந்தது. சுப்மன் கில்லின் ஃபார்ம் கேள்விக்குறியாக இருந்தது, அதேநேரம் ஜிதேஷ் சர்மா நன்றாகவே செயல்பட்டாலும் இந்திய அணியில் பவுலிங் ஆப்சனில் குறைகள் இருக்கவே செய்தன.

தென்னாப்பிரிக்காவிற்கு எதிரான கடைசி டி20 போட்டியில் கூட 5 பவுலிங் ஆப்சன்களை தாண்டி, 6வது பவுலராக அபிஷேக் சர்மாவையே பயன்படுத்தியிருந்தார் கேப்டன் சூர்யகுமார் யாதவ். ஆனால் தற்போது அணியில் அக்சர் பட்டேல் திரும்பியிருப்பது அணியின் பேட்டிங்கை வலுப்படுத்துவதோடு, இந்தியாவிற்கு இன்னொரு பவுலிங் ஆப்சனையும் எடுத்துவந்துள்ளது. ஷிவம் துபே இல்லை என்றாலும் இந்தியாவிற்கு 6 பவுலிங் ஆப்சன்கள் இடம்பெறும்வகையில் இந்திய அணி அறிவிக்கப்பட்டுள்ளது.

தற்போது அறிவிக்கப்பட்டிருக்கும் டி20 உலகக்கோப்பைக்கான இந்திய அணியில் அனைத்து கட்டங்களுக்கும் சரியாக வீரர்கள் பொருந்தியுள்ளனர். இந்த அணி சிறப்பாக செயல்பட்டால் சொந்தமண்ணில் இந்தியா 3வது டி20 உலகக்கோப்பையை கைப்பற்றும்.

அணியின் டாப் 3 பேட்ஸ்மேன்களாக அபிஷேக் சர்மா, சஞ்சு சாம்சன், திலக் வர்மா மூன்றுபேரும் அபாரமான ஃபார்முடன் வருகின்றனர். மிடில் ஆர்டரில் கேப்டன் சூர்யாவின் ஃபார்ம் மட்டுமே கேள்விக்குறியாக உள்ளது. மற்றபடி அக்சர் பட்டேல் மற்றும் ஷிவம் துபேவின் பேட்டிங் நன்றாக உள்ளது. ஃபினிசிங் ரோலில் வரும் ஹர்திக் பாண்டியா மரண அடிகொடுத்துவருகிறார். லோயர் ஆர்டரில் ஹர்சித் ராணாவால் சில பெரிய ஷாட்களை விளையாட முடியும், வருண் சக்கரவர்த்தி சமீபத்தில் தன்னுடைய பேட்டிங்கில் கவனம் செலுத்திவருவது குறிப்பிடத்தக்கது. பும்ரா மற்றும் அர்ஷ்தீப் சிங் இருவரும் புதியபந்து மற்றும் டெத் ஓவர்களில் சிறப்பாக செயல்பட்டுவருகின்றனர். இந்த பிளேயிங் 11 வீரர்களுக்கு பேக்கப் வீரர்களையும் சரியாக எடுத்துள்ளது தேர்வுக்குழு.

டாப் ஆர்டரில் சொதப்பல் ஏற்பட்டால், அபாரமான ஃபார்முடன் இருக்கும் இஷான் கிஷன் காத்திருக்கிறார். அக்சர் பட்டேலுக்கு மாற்றுவீரராக வாஷிங்டன் இருக்கிறார். 5 பவுலிங் ஆப்சன் போதுமென்றால் ஹர்சித் ராணாவிற்கு பதிலாக ரிங்கு சிங்குவால் ஃபினிசிங்கில் விளையாட முடியும். வருண் சக்கரவர்த்திக்கு பேக்கப்பாக குல்தீப் யாதவ் வரிசையை வலுவாக்குகிறார். இந்த அணி அனைத்துவிதத்திலும் தலைசிறந்த அணியாகவே இருக்கிறது. இந்தியா கோப்பையோடு திரும்பும் என எதிர்ப்பார்க்கலாம்..

எதிர்ப்பார்க்கப்படும் பிளேயிங் 11:

1. அபிஷேக் சர்மா

2. சஞ்சு சாம்சன் (விக்கெட் கீப்பர்)

3. திலக் வர்மா

4. சூர்யகுமார் யாதவ்

5. அக்சர் பட்டேல்

6. ஷிவம் துபே

7. ஹர்திக் பாண்டியா

8. ஹர்சித் ராணா

9. வருண் சக்கரவர்த்தி

10. அர்ஷ்தீப் சிங்

11. பும்ரா