98வது ஆஸ்கர் | 16 விருதுக்கான பிரிவில் SINNERS.. 13 விருதுக்கான பிரிவில் One Battle After Another!
98வது ஆஸ்கர் பரிந்துரைப் பட்டியலில் 'சின்னர்ஸ்' திரைப்படம் 16 பிரிவுகளில் இடம்பிடித்து வரலாறு படைத்துள்ளது. வேம்பையர் பின்னணியில் நிறவெறி பற்றிய கதையை மையமாக கொண்டு உருவாக்கப்பட்ட இப்படம், சிறந்த படம், இயக்குநர், நடிகர் உள்ளிட்ட பல பிரிவுகளில் நாமினேட் செய்யப்பட்டுள்ளது. இது ஆஸ்கர் வரலாற்றில் ஒரு புதிய சாதனையாகும்.
98வது ஆஸ்கர் விருதுகள் மார்ச் மாதம் 16ஆம் தேதி நடைபெற உள்ளது. சிறந்த திரைப்பட விருதுக்கான பொதுப் பட்டியலுக்கு அனுப்பப்பட்ட 317 படங்களிலிருந்து தகுதியான 201 படங்களின் பட்டியலை கடந்த வாரத்தில் வெளியிட்டிருந்தது ஆஸ்கர். இப்படியலில் இந்தியாவின் சார்பில் அனுப்பப்பட்ட `ஹோம்பவுண்ட்' திரைப்படமும் இடம்பெற்றிருந்தது.
இந்தசூழலில் இந்தப்படங்களிலிருந்து நாமினேட் செய்யப்படவிருக்கும் படங்களின் பட்டியலும், எந்தப்பிரிவில் படங்கள் இடம்பெற்றிருக்கிறது என்கிற விவரங்களும் இன்று கலிஃபோர்னியாவில் நடைபெற்ற அறிவிப்பு விழாவில் வெளியிடப்பட்டுள்ளது. இதில் இந்தியப் படமான ஹோம்பவுண்ட் இறுதிச் சுற்றுக்கு தகுதி பெறாமல் போனது ரசிகர்களிடையே ஏமாற்றத்தை ஏற்படுத்தி உள்ளது.
ஆனால் ஆஸ்கர் வரலாற்றில் எப்போதும் இல்லாதவிதமாக 16 பிரிவுகளில் இடம்பெற்று வரலாறு படைத்துள்ளது சின்னர்ஸ் திரைப்படம்.
வரலாறு படைத்த சின்னர்ஸ் திரைப்படம்..
கடந்த ஆண்டு ஏப்ரல் மாதம் வெளியான சின்னர்ஸ் திரைப்படம், வேம்பையர் பின்னணியில் நிறவெறி பற்றிய சுவாரஸ்யமான கதையை மையமாக கொண்டு உருவாக்கப்பட்டிருந்தது. அட்டகாசமான திரை அனுபவமாக இருந்த இப்படம், பெரும்பாலான ரசிகர்களை கவர்ந்தது. இந்தசூழலில் தான் 2026 ஆஸ்கர் விருதுக்கான பரிந்துரை பட்டியலில் 16 பிரிவுகளில் இடம்பெற்று வரலாறு படைத்துள்ளது.
98வது ஆஸ்கர் விருதுகளுக்கான இறுதிச்சுற்றுக்கு தகுதிபெற்றிருக்கும் 'Sinners' திரைப்படம், சிறந்த படம், சிறந்த இயக்குநர், சிறந்த நடிகர், சிறந்த துணை நடிகர், சிறந்த துணை நடிகை, சிறந்த அசல் திரைக்கதை, சிறந்த ஒளிப்பதிவு, சிறந்த கலை இயக்கம், சிறந்த ஆடை வடிவமைப்பு, சிறந்த படத்தொகுப்பு, சிறந்த ஒப்பனை மற்றும் சிகை அலங்காரம், சிறந்த ஒலி, சிறந்த VFX, சிறந்த பின்னணி இசை, சிறந்த பாடல் மற்றும் சிறந்த நடிகர் தேர்வு என 16 ஆஸ்கர் விருதுகளுக்கு நாமினேட் ஆகியுள்ளது. இத்தனை விருதுகளுக்கு ஒரே படம் நாமினேட் ஆவது ஆஸ்கர் வரலாற்றில் இதுவே முதன் முறை.
அதேபோல 2025-ல் லியோனார்டோ டிகாப்ரியோ நடிப்பில் வெளிவந்த ஒன் பேட்டில் ஆஃப்டர் அனதர் (One Battle After Another) திரைப்படம் 13 பிரிவுகளில் இடம்பிடித்து அசத்தியுள்ளது.
மேலும் 98வது ஆஸ்கர் ரேஸில், சிறந்த நடிகர் விருதுக்கு டிமோதி சாலமேட் (மார்ட்டி சுப்ரீம்), லியோனார்டோ டிகாப்ரியோ (ஒன் பேட்டில் ஆஃப்டர் அனதர்), எத்தன் ஹாக் (ப்ளூ மூன்), மைக்கேல் பி ஜோர்டான் (சின்னர்ஸ்) என பல முன்னணி நட்சத்திரங்கள் இடம்பிடித்துள்ளனர்.
