தமிழ் சினிமாவில் தயாரிப்பாளராக “தம்பிக்கோட்டை, சலீம், தர்மதுரை” முதலிய ஹிட் படங்களை தயாரித்த ஆர்.கே. சுரேஷ், விநியோகிஸ்தராகவும் பல வெற்றி திரைப்படங்களில் கைக்கோர்த்தார். அதற்கு பிறகு தயாரிப்பாளராக இருந்த ஆர்.கே.சுரேஷை தன்னுடைய தாரை தப்பட்டை திரைப்படத்தில் வில்லன் ரோலில் இயக்குநர் பாலா அறிமுகம் செய்துவைத்தார். அதில் தன்னுடைய சிறப்பான வில்லத்தன நடிப்பால் கவர்ந்த ஆர்.கே.சுரேஷை, “மருது, ஹரஹர மகாதேவகி, இப்படை வெல்லும், காளி, பில்லா பாண்டி, நம்ம வீட்டு பிள்ளை, விருமன்” உள்ளிட்ட படங்களில் இயக்குநர்கள் மெய்ன் கேரக்டர்களில் நடிக்கவைத்தனர்.
அதன்பிறகு மலையாளத்தில் கேரளா ஸ்டேட் விருது வாங்கிய “ஜோசப்” திரைப்படத்தின் ரீமேக்கில் நடித்த ஆர்.கே.சுரேஷ், தற்போது தானே இயக்கி நடிக்கும் “தென் மாவட்டம்” திரைப்படத்தில் நடித்துவருகிறார். இத்திரைப்படத்தின் ஃபர்ஸ்ட் லுக் வெளியான போது தான் பிரச்னை வெடித்தது.
தென் மாவட்டம் திரைப்படத்தில் ஃபர்ஸ்ட் லுக்கில் இசை என்ற இடத்தில் யுவன் சங்கர் ராஜா என்ற பெயர் இடம்பெற்ற நிலையில், ரசிகர்கள் குழப்பமடைந்து நிறைய பதிவுகளையும் கமெண்டுகளையும் போட ஆரம்பித்தனர். ரசிகர்களிடையே ஏற்பட்ட சலசலப்புகளுக்கு இடையே அதை தெளிவுசெய்ய நினைத்த யுவன் சங்கர் ராஜா, அந்த திரைப்படத்திற்கு இசையமைக்கவில்லை என ஒரு பதிவை பதிவிட்டார். இதற்கிடையில் யுவனின் பதிவுக்கு உடனடியாக பதிலளித்திருக்கும் ஆர்.கே. சுரேஷ், நீங்கள் படத்தில் ஒப்பந்தமாகி இருக்கிங்க சார் என்று பதிவிட்டதால் பரப்பான சூழல் ஏற்பட்டுள்ளது.
தென் மாவட்டம் படத்தின் ஃபர்ஸ்ட் லுக் போஸ்டர் குறித்து தெளிவுபடுத்துவதாக எக்ஸ் தளத்தில் பதிவிட்டிருக்கும் யுவன், “ ஊடகம் மற்றும் ரசிகர்களுக்கு ஒன்றை தெளிவுபடுத்த விரும்புகிறேன். தென் மாவட்டம் என்ற படத்தில் நான் இசையமைப்பாளராக கமிட் ஆகவும் இல்லை. யாரும் அது தொடர்பாக என்னிடம் பேசவும் இல்லை” என்று பதிவிட்டுள்ளார்.
இந்நிலையில் இதற்கு உடனடியாக பதிலளித்திருக்கும் ஆர்.கே. சுரேஷ், “யுவன் சார் நீங்கள் படத்திற்கும், லைவ் கான்சர்ட்டிற்கும் ஒப்பந்தமாகி இருக்கிங்க. ஒப்பந்தத்தை தெளிவாக சரிபார்க்கவும்” என்று பதிவிட்டுள்ளார். யுவன் பதிவால் ஆர்.கே.சுரேஷை விமர்சித்த ரசிகர்கள், தற்போது ஆர்.கே.சுரேஷ் பதிவால் குழப்படைந்துள்ளனர்.
இந்நிலையில் அடுத்தடுத்து யுவனுக்கு கிளியர் செய்யும் விதமாக பதிவுகளை பதிவிட்டுள்ளார் ஆர்.கே.சுரேஷ். அந்த பதிவுகளில், “மாமனிதன் படத்தின் வெளியீட்டின்போது ஏற்பட்ட பிரச்சனையில் உங்களுக்கு பணஉதவி செய்து அந்த சமயத்தில் உங்களுக்கு உற்ற நண்பனாக ஒரே நாளில் பிரச்சினை முடித்தோம். ஒப்பந்தத்தை சரியாக பாருங்கள் சகோதரரே. தென் மாவட்டத்தில் சந்திப்போம், நன்றி” என்று பதிவிட்டுள்ளார்.
