`ஆந்திரா கிங் தாலுகா' டோலிவுட்டின் லேட்டஸ்ட் ஹிட் எப்படி? | Andhra King Taluka Review | RaPo|Upendra

தனக்காக பெரிய தியாகத்தை செய்த ரசிகனை தேடி செல்லும் ஒரு ஸ்டாரின் பயணமே `ஆந்திரா கிங் தாலுகா'

இந்த வாரம் வெளியான படங்களில் அதிகம் பேசப்படக் கூடிய படமாக மாறி இருக்கிறது `ஆந்திரா கிங் தாலுகா'. கடந்த சில வருடங்களாக தோல்வி படங்களாக அமைந்து வந்த ராம் பொத்தினேனிக்கு இந்தப் படம் பெரிய கம்பேக் ஆக அமைந்திருக்கிறது. அக்கட தேசத்தில் இவ்வளோ பெரிய டாக் ஏற்படுத்திய படத்தில் அப்படி என்ன இருக்கிறது?  

தெலுங்கு திரையுலகின் மிகப்பெரிய நட்சத்திரம் சூர்யா (உபேந்திரா). தொடர்ச்சியாக 9 படங்களின்  தோல்வியை தொடர்ந்து தன்னுடைய 100வது படத்தில் நடித்து வருகிறார். ஆனால் தயாரிப்பாளோரோ இதற்கு மேல் தன்னால் படத்துக்கு செலவு செய்ய முடியாது என அப்படத்தை நிறுத்திவிடுகிறார். படத்தை முடிக்க இன்னும் 3 கோடி தேவை. அந்தப் பணம் வேண்டும் என்றால் ஒரு படத்தில் அப்பா ரோலில் நடிக்க வேண்டும் என நிர்பந்தம் முன்வைக்கப்படுகிறது. முதலில் மறுத்தாலும், பணத்தை பெற அந்த ஒரு வழிதான் இருக்கிறது என்ற நிலையை உணர்ந்து சம்மதம் சொல்ல தயாராகிறார். அந்த சமயம் பார்த்து சூர்யாவின் வாங்கிக் கணக்கில் 3 கோடி ரூபாய் வரவு வைக்கப்படுகிறது. அதை அனுப்பியது சூர்யாவின் ரசிகர் மன்ற தலைவர் சாகர் (ராம் பொத்தினேனி) என தெரிய வருகிறது. ஒரு ரசிகர், அவரை இதுவரை தான் சந்தித்தது கூட இல்லை, அவருக்காக எதுவும் செய்ததே இல்லை. ஆனால் அவர் இவ்வளவு பெரிய தொகையை அனுப்ப வேண்டும். யார் அந்த சாகர் என தேடி சூர்யா கிளம்புகிறார். அதன் பின் என்ன எல்லாம் தெரிந்து கொள்கிறார் என்பதே கதை.

ராம் பொத்தினேனி தன் ஆதர்ச நடிகர் மீது காட்டும் ஆர்வம், அவருக்காக சண்டையிடுவது, பாக்யஸ்ரீ மீது காதல், அவரது அப்பாவிடம் சவால் விடுவது என பல காட்சிகளில் சிறப்பாக நடித்திருக்கிறார். சொல்லப்போனால் இந்தப் படத்தில் மிகவும் ஃபிரெஷ்ஷாக இருக்கிறார். பாக்யஸ்ரீ தன் காதலை தக்க வைக்க போராடுவது, ராமின் ஒரு முடிவுக்கு பிறகு எமோஷனலாக பேசுவது என கச்சிதமான நடிப்பு. ஒரு எக்ஸ்டென்டட் கேமியோ பாத்திரம் தான் உபேந்திராவுக்கு. ஆனால் ஒரு நிறைவான நடிப்பை கொடுத்திருக்கிறார். தன் மரியாதை போய்விடுமோ என பயப்படுவது, ரசிகரை சந்திக்க ஆர்வமாக கிளம்புவது என பல இடங்களில் சிறப்பு. என்ன, டப்பிங்கில் லிப் சிங்க் மட்டும் கொடூரமாக நான் சிங்க்கில் இருக்கிறது. ராவ் ரமேஷ் மிக இயல்பாக எமோஷனல் காட்சிகளில் நடித்து அசத்துகிறார். ஹீரோவின் நண்பராக பெரிய பாத்திரத்தில் வரும் ராகுல் ராமகிருஷ்ணாவை விட, கெஸ்ட் ரோலில் வரும் சத்யா காமெடிக்கு வலு சேர்க்கிறார்.

சித்தார்த்தா நுனி, ஜார்ஜ் வில்லியம்ஸ் ஒளிப்பதிவு படத்தை மிகத் தரமாக கொடுத்திருக்கிறது. விவேக் மெர்வின் பின்னணி இசை படத்தின் எமோஷனல் காட்சிகளில் பெரிய அளவில் கை கொடுக்கிறது. 80களில் இருந்து 2002 வரை நிகழும் கதை என்பதால், அந்த காலகட்டத்தை பிரதிபலிக்கும் வகையிலான சைக்கிள், கேசட், உடைகள் எனப் பலவற்றை உறுத்தாத வகையில் படத்துக்குள் சேர்த்த விதமும் சிறப்பு.

படத்தில் பெரிதும் பாராட்டாப்பட வேண்டியது, இக்கதை எழுதப்பட்ட விதம். தன் ஹீரோவின் ஆதர்ச ஹீரோவின் கரியரை காப்பற்ற ஒரு ரசிகன் நினைக்கிறான். இந்த ஒன்லைனை, அந்த ரசிகரின் அறிமுக காட்சியிலேயே நமக்கு உணர்த்த, சரிந்து விழும் ஹீரோவின் கட் அவுட்டை விழாமல் பிடித்து நிறுத்துகிறான் என்று வைக்கப்பட்டிருக்கிறது அந்த ஓப்பனிங் காட்சி. இப்படி படத்தில் பல விஷயங்களை ரசிக்கும்படி வைத்திருக்கிறார் இயக்குநர் மகேஷ்பாபு. ஹீரோவால் அந்த ரசிகருக்கு, ரசிக்கரால் அந்த ஹீரோவுக்கும் வாழ்க்கை மீதான ஏற்படும் புரிதல்களை எழுதி இருந்த விதமும் ரசிக்கும்படி இருந்தன.

இந்தப் படத்தின் குறைகள் என்ன என்றால், ஓரளவுக்கு மேல் கதை நம்ப முடியாத தளத்திற்கு செல்வது தான். ஹீரோ - ரசிகன் என்ற உணர்வு ரீதியான தளத்தில் கதையில் சொல்லப்படும் விஷயங்கள் எல்லாம் ஓகே. ஆனால் ஒரு அளவுக்கு மீறி ஹீரோ ஒரு சவால் விடுவதும், அதை நிறைவேற்ற அவர் செய்யும் விஷயங்களும் அத்தனை நம்பும்படி இல்லை. மேலும் அந்த சவாலை மிக எளிமையாக சாதித்து விடுகிறார் என்பதால், அதில் சுவாரஸ்யம் ஏதும் இல்லை. அதோடு தன் வாழ்க்கையில் முக்கியமான ஒரு விஷயத்தை, ஆதர்ச நாயகனுக்காக தியாகம் செய்கிறார் என்பதும் பெரிதாக நம்ப முடியவில்லை.

ஒட்டு மொத்தமாக பார்த்தால், கதைக்குள் நிகழும் விஷயங்களில் இன்னும் நம்பகத்தமை சேர்த்திருந்தால், மிக சிறப்பான ஒரு பீல்குட் படமாக வந்திருக்கும் இந்த `ஆந்திரா கிங் தாலுகா'. இப்போதும் பெரிய குறை ஏதும் இல்லை, தாராளமாக ஒரு வாட்சை போடலாம்!