வாழ்நாள் சாதனையாளர் விருது| ”இன்னும் 100 ஜென்மங்கள் எடுத்தாலும்..” எமோசனலாக பேசிய ரஜினி!
கோவாவில் 56-வது சர்வதேச திரைப்பட விழா (IFFI) நவம்பர் 20-ம் தேதி முதல் நடைபெற்று வருகிறது. இதில், உலகம் முழுவதும் 81 நாடுகளிலிருந்து 240-க்கும் மேற்பட்ட திரைப்படங்கள் திரையிடப்பட்டன.
இந்த விழாவில், லைகா புரொடக்ஷன் சார்பில் சுபாஸ்கரன் தயாரிப்பில், சூப்பர் ஸ்டார் ரஜினிகாந்த் சிறப்பு தோற்றத்தில் நடித்து, ஐஸ்வர்யா ரஜினிகாந்த் இயக்கிய `லால் சலாம்' திரைப்படம் சிறப்புத் திரையிடலுக்காக தேர்வு செய்யப்பட்டு நேற்று (நவம்பர் 28) திரையிடப்பட்டது. இந்த திரையிடலுக்கு முன் ரஜினிகாந்த் பேசிய போது "இந்தப் படத்தில் நான் நடிக்கிறேன் என அறிவிப்பு வந்த போது, என் மகள் ஐஸ்வர்யா இயக்குகிறார் என்பதால் இந்தப் படத்தில் நடிக்கிறேன் என பலரும் நினைத்தார்கள். அது உண்மையில்லை, மத ஒற்றுமை பற்றி பேசும் இந்தப் படத்தின் கதைக்காக நடித்தேன். இப்படத்தில் நடித்ததில் ஒரு தந்தையாகவும், நடிகராகவும் மகிழ்ச்சி" என்றார்.
அதன் பின்னர் நேற்று மாலை நடைபெற்ற நிறைவு விழாவின் போது, சூப்பர் ஸ்டார் ரஜினிகாந்துக்கு வாழ்நாள் சாதனையாளர் விருது வழங்கப்பட்டது. திரைத்துறையில் 50 ஆண்டுகளை நிறைவுசெய்ததை கவுரவிக்கும் விதமாக ரஜினிகாந்துக்கு இந்த விருது வழங்கப்பட்டது. இந்த மேடையில் பேசிய ரஜினிகாந்த் "நான் இங்கு பணிவுடனும், நன்றியுடனும் நிற்கிறேன். சினிமாவில் 50 ஆண்டுகள், திரும்பிப் பார்க்கும்போது 10, 15 வருடங்கள் போல தான் இருக்கிறது. அதற்கு காரணம் சினிமாவையும், நடிப்பையும் நான் காதலிக்கிறேன். இன்னும் 100 ஜென்மங்கள் எடுத்தாலும் மீண்டும் நடிகராகவும், அதிலும் ரஜினிகாந்த்தாகவும் பிறக்கவே விரும்புகிறேன். இந்தப் பெருமையானது சினிமாத்துறை மற்றும் அதில் இருக்கும் எல்லோருக்குமானது. குறிப்பாக என்னை வாழவைக்கும் தெய்வங்களான மக்களுக்கானது" என்றார்.
