அழுத்தமான காதல் கதையாக ஈர்க்கிறதா `Tere Ishk Mein'? | Review | Dhanush | Kriti Sanon | AR Rahman
அழுத்தமான காதல் கதையாக ஈர்க்கிறதா `Tere Ishk Mein'?(2 / 5)
காதலும் காதல் நிமித்தமான பாடுகளே `தேரே இஷக் மே'
டெல்லி கல்லூரியில் சட்டம் பயின்று வரும் மாணவர் ஷங்கர் (தனுஷ்). அவரது கோபத்தின் காரணமாக பல்வேறு சண்டைகளில் ஈடுபடுகிறார். அதே கல்லூரியில் மனிதர்களின் வன்முறையான குணத்தை மாற்ற முடியும் என்ற தன் PHD ஆய்வறிக்கையை சமர்பிக்கிறார் முக்தி (க்ரித்தி சனோன்). ஆனால் கல்லூரிப் பேராசிரியர்கள் இதனை நிரூபிக்கச் சொல்லி கேட்க, வன்முறையாளரான ஷங்கரை அமைதியான மனிதராக மாற்றும் முயற்சியில் இறங்குகிறார் முக்தி.
இந்த முயற்சியின் ஊடாக ஷங்கர், முக்தி மீது காதல் கொள்கிறார். ஆனால் இந்தக் காதலில் ஒரு சிக்கல் வருகிறது. இதிலிருந்து சில வருடங்கள் கழித்து லே லடாக்கில் ஃபைட்டர் பைலட்டாக இருக்கும் சங்கரை முக்தி ஒரு போர்ச் சூழலில் மீண்டும் சந்திக்கும் நிலை ஏற்படுகிறது. இந்த காதலில் வந்த சிக்கல் என்ன? மீண்டும் இவர்கள் சந்திக்கும்போது என்ன நடந்தது என்பதெல்லாம்தான் `தேரே இஷக் மே'.
ஆனந்த் எல் ராய் வழக்கம்போல் தன் ஆண் - பெண் உறவு சிக்கல் களத்தில்தான் இந்த முறையும் இறங்கி இருக்கிறார். இம்முறை கதையில் இருக்கும் அழுத்தத்தைவிட நடிகர்களின் நடிப்பில் இருக்கும் அழுத்தம் படத்தின்மீது கவனம் செலுத்த வைக்கிறது. ஹிமான்ஷூ ஷர்மா, நீரஜ் யாதவ் எழுதியிருக்கும் பல வசனங்கள் அழுத்தமாக இருந்ததும் கூடுதல் சிறப்பு.
ஷங்கர் பாத்திரத்தில் தனுஷ் மிகச் சிறப்பாக நடித்திருக்கிறார். தன் கோபத்தை அடக்க தெரியாத இளைஞனாகச் சண்டையிடுவது, க்ரித்தி மீது காதல் கொள்வது, காதலை இழக்கும்போது உடைந்துபோவது என சூப் பாய் ரோலில் பல டிகிரி முடித்தவராய் ஈர்க்கிறார். இவருக்கு சற்றும் குறைவில்லாமல் க்ரித்தியும் முக்தி பாத்திரத்தைச் செய்திருக்கிறார். தனுஷை ஏற்பதா.. விடுவதா எனக் குழம்புவது, அவரைக் கையாள முடியாமல் கலங்குவது எனப் பல காட்சிகளில் சிறப்பான நடிப்பு. ஒரு சின்ன ரோலில் வந்தாலும் பிரகாஷ் ராஜ் நடிப்பு மனதில் நிற்கிறது. இவர்கள் தவிர பலர் இருந்தாலும் யாருக்கும் முக்கியத்துவம் வாய்ந்த பாத்திரங்களோ, நம்மை கவரும் நடிப்போ இல்லை.
இந்தப் படத்தின் பெரிய பலம் ஏ.ஆர்.ரஹ்மான் இசையில் உருவான பாடல்களும், பின்னணி இசையும். எமோஷனலாக இருக்கும் காட்சிகள் அத்தனையும் ரஹ்மான் இசையால் உயிரோட்டம் அடைகிறது. பாடல்களில் டைட்டில் ட்ராக்கான Tere Ishk Mein பல இடங்களில் ஒலிப்பது அழகாக பொருந்திப் போகிறது. Usey Kehna, Deewaana Deewaana பாடல்களும் இதம். துஷார் ரேயின் ஒளிப்பதிவு இந்த தீவிரமான காதல் கதைக்கு ஏற்ற ஒரு தன்மையை திரையில் கொடுக்கிறது.
படத்தின் குறைகள் எனப் பார்த்தால், நடிப்பிலும், வசனங்களிலும் இருக்கும் தீவிரத்தன்மை படத்தின் கதையில் இல்லை. உண்மையில் ஷங்கர் - முக்தி இடையேயான பிரச்னைதான் என்ன? எதற்காக முக்தி, ஷங்கரை தொடர்ச்சியாக காயப்படுத்துகிறார்? அவர்கள் இணைவதில் என்ன சிக்கல் என்பதில் எந்த தெளிவும் இல்லை. இன்னும் சொல்லப்போனால், இந்தக் கதையை டிராஜிடியாக கொண்டுசெல்ல வேண்டும் என வலுக்கட்டாயமாக காட்சிகள் எழுதப்பட்டுள்ளதே தவிர, எந்த ஒரு பிரச்னையும் இயல்பாக இல்லை. Raanjhanaa யுனிவர்சை இதில் இணைத்த விதம் நல்ல ஐடியாவாக இருந்தாலும், அது இப்படத்திற்கு எந்த விதத்திலும் உதவவில்லை. Raanjhanaa படத்தில் குந்தன், ஸோயாவை அளவு கடந்து காதலிக்கிறான் என்ற அடித்தளத்தின் மேல் காட்சிகள் அமைக்கப்பட்டிருக்கும். ஆனால், இதில் அப்படியான அடித்தளம் ஏதும் இல்லாமல் வெறுமனே சோகமான காட்சிகளை தொகுத்தது எந்த தாக்கத்தையும் கொடுக்கவில்லை.
மொத்தத்தில் கதையாக இன்னும் வலுவாக எழுதப்பட்டிருந்தால், நம்மை நெகிழச் செய்யும் ஒரு க்ளாஸிக் காதல் படமாக அமைந்திருக்கும் இந்த `தேரே இஷக் மே'.
