’திட்டமிட்ட போர்க்குற்றம்’ சரணடைய வந்த பாலஸ்தீனியர்களை சுட்டுக்கொன்ற இஸ்ரேல்.. என்ன நடந்தது?

மேற்குக் கரையின் ஜெனின் நகரில் நடைபெற்ற இஸ்ரேல் பாதுகாப்பு படையினரின் நடவடிக்கையில், சரணடைய வந்த இரண்டு பாலஸ்தீனியர்களை பாதுகாப்புப் படையினர் சுட்டுக்கொன்ற வீடியோ கடந்த வியாழக்கிழமை (நவம்பர் 27) வெளியாகி இருக்கிறது. அதில், ஒரு கிடங்கை இயந்திரத்தின் உதவியுடன் பாதுகாப்பு படையினர் தகர்க்கிறார்கள். அப்போது, உள்ளிருந்து கைகளை தூக்கியபடி வந்த இருவர் தங்களிடம் ஆயுதங்கள் இல்லை என்பதைபோல சட்டையை உயர்த்தி காண்பிக்கின்றனர். அவர்களை கீழே தள்ளி உதைத்த இஸ்ரேல் வீரர்கள் மீண்டும் அவர்களை கிடங்கிற்குள் தவழ்ந்தபடி நுழைய செய்தனர். இதையடுத்து, நிராயுதபாணியாக சரணடைய வந்த இருவரை இஸ்ரேல் பாதுகாப்புப் படையினர் சுட்டுக்கொன்றனர். (பலவீனமான மனம் கொண்டவர்கள் தவிர்ப்பது நல்லது)

சுட்டுக் கொல்லப்பட்டவர்கள் அல்-முன்டாசிர் பில்லா அப்துல்லா (26) மற்றும் யூசுப் அசாசா (37) என பாலஸ்தீன சுகாதார அமைச்சகம் தெரிவித்துள்ளது. இதைத் தொடர்ந்து இந்த வீடியோ வெளியான பின்னர் இஸ்ரேல் ராணுவம் வெளியிட்ட அறிக்கையில், ”அவர்கள் இஸ்ரேல் படையினர் மீது தாக்குதல் நடத்தினார்கள். பல மணி நேர சண்டைக்குப் பிறகே சுட்டுக் கொல்லப்பட்டிருக்கின்றனர்” எனத் தெரிவித்துள்ளது.

இதையடுத்து, இந்தத் துப்பாக்கிச் சூடு சம்பவத்தை "கொடுமையிலும் கொடூரமான சட்டவிரோத கொலைகள்" மற்றும் "இஸ்ரேலின் திட்டமிட்ட போர்க்குற்றம்" என்று அறிவித்த பாலஸ்தீன வெளியுறவு அமைச்சகம், இஸ்ரேலின் கொலைத் தாக்குதலை நிறுத்த உடனடி நடவடிக்கை எடுக்க வேண்டும் என சர்வதேச நாடுகளை கேட்டுக்கொண்டுள்ளது.

இந்த படுகொலைகள் குறித்து பேசியிருக்கும் இஸ்ரேலிய பாதுகாப்பு அமைச்சர், ”இந்த சம்பவத்தில் இஸ்ரேல் ராணுவம் சிறப்பாக செயல்பட்டிருக்கிறது. பயங்கரவாதிகள் உடனடியாக கொல்லப்பட வேண்டியவர்கள்” எனத் தெரிவித்துள்ளார்.

முன்னதாக, இரண்டு ஆண்டுகளுக்கும் மேலாக நடைபெற்று வந்த இஸ்ரேல் - காஸா போரை முடிவுக்குக் கொண்டுவரும் நோக்கில், அமெரிக்க அதிபர் டொனால்டு ட்ரம்ப் தனது 20 அம்ச அமைதித் திட்டத்தைப் பரிந்துரைத்தார். இஸ்ரேலிய பிணைக்கைதிகளை விடுவிப்பதும், இஸ்ரேலிய வீரர்களை ஓரளவு திரும்பப் பெறுவதும் பரிந்துரை விதிமுறைகளில் அடக்கமாகும். இப்பரிந்துரையின்படி இருதரப்பிலும் ஒப்பந்தம் கையெழுத்திடப்பட்டு போர் நிறுத்தம் ஏற்பட்டது. ஆனால், பாலஸ்தீனியர்கள் மீதான தாக்குதல்களை தொடர்ந்து இஸ்ரேல் ராணுவம் நடத்தி வருகிறது. இஸ்ரேல் தரப்பிலிருந்து இந்தத் தாக்குதல்கள் ஆயுதக் குழுக்களுக்கு எதிரானது என கூறினாலும், மேற்குக் கரைப் பகுதியில் பாதுகாப்புப் படையினர் மனித உரிமை மீறலில் ஈடுபட்டு வருவது தொடர்கதையாகி இருக்கிறது.