வெள்ளைமாளிகை அருகே துப்பாக்கிச் சூடு.. 19 நாடுகளுக்கு செக் வைத்த ட்ரம்ப்.. இந்தியாவுக்கு பாதிப்பா?

அமெரிக்க தலைநகர் வாஷிங்டனில் உள்ள வெள்ளை மாளிகை அருகே கடந்த இரண்டு நாட்களுக்கு முன்பு வாலிபர் ஒருவர் திடீரென்று துப்பாக்கிச் சூடு நடத்தினார். இந்த தாக்குதலில் தேசிய காவல் படையைச் சேர்ந்த 2 வீரர்கள் உயிரிழந்தனர். இதற்கிடையே துப்பாக்கிச் சூடு நடத்திய வாலிபர் ஆப்கானிஸ்தானைச் சேர்ந்த 29 வயதான ரஹ்மானுல்லா லகன்வால் என்று அடையாளம் காணப்பட்டுள்ளது. போலீசார் சுட்டதில் ரஹ்மானுல்லாவுக்கு காயங்கள் ஏற்பட்டிருந்தாலும் உயிருக்கு எந்த ஆபத்தும் இல்லை என்று அதிகாரிகள் தெரிவித்தனர். இவர் கடந்த 2021-ஆம் ஆண்டு ஆப்கானிஸ்தானில் நிலவிய குழப்பமான சூழலின்போது அமெரிக்காவில் தஞ்சம் அடைந்தவர் என்றும் அப்போதைய அதிபர் ஜோபைடன் நிர்வாகத்தின் திட்டமான ’ஆபரேஷன் அல்லீசஸ் வெல்கம்’ மூலம் அமெரிக்காவிற்குள் நுழைந்தார் என்றும் அதிகாரிகள் தெரிவித்தனர். அவர், ஆப்கானிஸ்தானில் அமெரிக்க சிறப்புப் படைகளுடன் இணைந்து பணியாற்றியதாகவும், அவர் ஒரு தசாப்தத்திற்கும் மேலாக ஆப்கானிஸ்தான் இராணுவத்தில் ஒரு சிப்பாயாக இருந்ததாகவும் கூறப்படுகிறது. அதேநேரத்தில், அவர் துப்பாக்கிச் சூடு நடத்திய காரணம் குறித்து விசாரணை நடைபெற்று வருகிறது.

இந்த நிலையில், தேசிய காவல் படையைச் சேர்ந்த வீரர்கள் உயிரிழந்ததைத் தொடர்ந்து அதிபர் டொனால்டு ட்ரம்ப், 19 நாடுகளுக்கான கிரீன் கார்டுகளை மறுபரிசீலனை செய்ய USCIS-க்கு உத்தரவிட்டுள்ளார்.

முன்னர் ’கவலைக்குரிய நாடுகள்’ என்று வகைப்படுத்தப்பட்ட 19 நாடுகளைச் சேர்ந்த நிரந்தர குடியிருப்பாளர்கள் வைத்திருக்கும் ஒவ்வொரு கிரீன் கார்டையும் விரிவான மதிப்பாய்வு செய்யுமாறு அமெரிக்க அதிபர் ட்ரம்ப் அமெரிக்க குடியுரிமை மற்றும் குடிவரவு சேவைகள் (USCIS)-க்கு உத்தரவிட்டுள்ளார். USCIS வெளியிட்டுள்ள புதிய வழிகாட்டுதலின்கீழ், ’குடியேற்ற நிலையை மதிப்பிடும்போது, ​​விண்ணப்பதாரரின் பிறந்த நாட்டை அதிகாரிகள் ஒரு பெரிய பாதகமான காரணியாக கருதலாம். 19 கவலைக்குரிய நாடுகளில் இருந்துவரும் அனைத்து நிரந்தர குடியிருப்பாளர்களுக்கும் இந்த மதிப்பாய்வு பொருந்தும், அவர்களின் கிரீன் கார்டுகள் முந்தைய நிர்வாகங்களின்கீழ் அங்கீகரிக்கப்பட்டிருந்தாலும் இது பொருந்தும்’ எனத் தெரிவிக்கப்பட்டுள்ளது. 19 நாடுகளுக்கான இந்தப் பட்டியலில் ஆப்கானிஸ்தான், பர்மா, சாட், காங்கோ குடியரசு, எக்குவடோரியல் கினியா, எரித்திரியா, ஹைட்டி, ஈரான், லிபியா, சோமாலியா, சூடான், ஏமன், புருண்டி, கியூபா, லாவோஸ், சியரா லியோன், டோகோ, துர்க்மெனிஸ்தான் மற்றும் வெனிசுலா ஆகிய நாடுகள் இடம்பெற்றுள்ளன. அதேநேரத்தில், இந்த நடவடிக்கை இந்தியர்களைப் பாதிக்காது. ஆனால் இந்த நடவடிக்கை பரந்த குடியேற்ற ஒடுக்குமுறையின் ஒரு பகுதியாகும் என்றும் மேலும் கூடுதல் கொள்கை மாற்றங்களைக் குறிக்கலாம் என்றும் நிபுணர்கள் எச்சரிக்கின்றனர்.

இந்த நடவடிக்கை குறித்து USCIS இயக்குநர் ஜோசப் எட்லோ, ”குடியேற்ற சலுகைகளை மதிப்பிடும்போது, விண்ணப்பதாரரின் பிறப்பிடத்தை ஒரு வலுவான பாதகமான காரணியாகக் கருதுவதற்கு புதிய கொள்கை அதிகாரிகளுக்கு அதிகாரமளிக்கிறது. ஒவ்வொரு நாட்டு குடியிருப்புவாசியும் அதிகபட்ச அளவில் பரிசோதிக்கப்படுவதை உறுதி செய்வதே எனது முதன்மை பொறுப்பு. அமெரிக்க உயிர்களுக்கு முன்னுரிமை அளிப்பதே இதன் நோக்கம்” என அவர் தெரிவித்துள்ளார்.