SA20 லீக் இறுதிப்போட்டியில் பிரேவிஸ் சதம் அடித்தாலும், சன்ரைசர்ஸ் ஈஸ்டர்ன் கேப் அணி 6 விக்கெட்டுகள் வித்தியாசத்தில் வெற்றி பெற்று 3வது முறையாக கோப்பையை கைப்பற்றியது. கேப்டன் ஸ்டப்ஸ் மற்றும் ப்ரீட்ஸ்கி இருவரும் நிதானமாக ஆடி வெற்றியை உறுதி செய்தனர்.
2025-26ஆம் ஆண்டுக்கான SA20 லீக்கின் இறுதிப்போட்டி பிரிட்டோரியஸ் கேபிடல்ஸ் மற்றும் சன்ரைசர்ஸ் ஈஸ்டர்ன் கேப் அணிகளுக்கு இடையே நேற்று நடைபெற்றது.
பரபரப்பாக நடைபெற்ற போட்டியில் கேசவ் மஹாராஜ் தலைமையிலான பிரிட்டோரியஸ் கேபிடல்ஸ் அணி முதலில் பேட்டிங் செய்தது. 56 பந்தில் 8 பவுண்டரிகள் 7 சிக்சர்கள் என துவம்சம் செய்த டெவால்ட் பிரேவிஸ் சதமடித்து அசத்தினார். SA20 லீக் வரலாற்றில் இறுதிப்போட்டியில் சதமடித்த முதல் வீரராக சாதனை படைத்தார் டெவால்ட் பிரேவிஸ்.
ஆனால் அவரைத்தவிர மற்ற எந்த வீரர்களும் சோபிக்காத நிலையில், 20 ஓவரில் வெறும் 158/7 ரன்களை மட்டுமே அடித்தது கேபிடல்ஸ் அணி.
159 ரன்கள் அடித்தால் வெற்றி என விளையாடிய சன்ரைசர்ஸ் ஈஸ்டர்ன் கேப் அணி 48 ரன்களுக்கு 4 விக்கெட்டுகளை இழந்து தடுமாறியது. ஒரு பக்கம் விக்கெட்டுகள் சரிய மறுமுனையில் கைக்கோர்த்த கேப்டன் ஸ்டப்ஸ் மற்றும் ப்ரீட்ஸ்கி இருவரும் நிதானமான ஆட்டத்தை வெளிப்படுத்தினர்.
16வது ஓவர் வரை 120 ஸ்ட்ரைக்ரேட்டில் பேட்டிங் செய்த இந்த ஜோடி கடைசி 4 ஓவரில் ஒரு ஓவருக்கு 13 ரன்கள் தேவையாக இருந்தபோது அதிரடிக்கு திரும்பியது. ப்ரீட்ஸ்கி 68 ரன்களும், கேப்டன் டிரிஸ்டன் ஸ்டப்ஸ் 63 ரன்களும் அடித்து அசத்த 6 விக்கெட்டுகள் வித்தியாசத்தில் வெற்றிபெற்று கோப்பையை தட்டிச்சென்றது சன்ரைசர்ஸ் அணி.
முதலிரண்டு சீசன்களில் கோப்பை வென்ற சன்ரைசர்ஸ் அணி தங்களுடைய 3வது SA20 கோப்பையை வென்று அசத்தியது. மொத்தம் 4 சீசன்களில் 3 முறை சன்ரைசர்ஸ் அணியும், ஒருமுறை மும்பையும் கோப்பையை வென்றுள்ளன.