10, 6, 0.. மீண்டும் மீண்டும் ஏமாற்றம்.. முதல் பந்திலேயே 0 ரன்னில் சாம்சன் அவுட்!
இந்திய அணியின் தொடக்க வீரர் சஞ்சு சாம்சன், மூன்றாவது டி20 போட்டியில் முதல் பந்திலேயே 0 ரன்னில் அவுட்டாகி ரசிகர்களை ஏமாற்றினார். இதனால், சுப்மன் கில்லின் வாய்ப்பை இழந்ததற்கு ரசிகர்கள் அதிருப்தி அடைந்துள்ளனர். இந்தியா 154 ரன்கள் அடிக்க வேண்டிய நிலையில், சாம்சனின் தொடர்ச்சியான மோசமான ஆட்டம் கேள்விக்குறியாகியுள்ளது.
இந்தியாவில் சுற்றுப்பயணம் மேற்கொண்டிருக்கும் நியூசிலாந்து அணி, 3 போட்டிகள் கொண்ட ஒருநாள் தொடர் மற்றும் 5 போட்டிகள் கொண்ட டி20 கிரிக்கெட் தொடர்களில் பங்கேற்று உள்ளது. முன்னதாக, இவ்விரு அணிகளுக்கு இடையிலான ஒருநாள் தொடரை 2-1 என வென்ற நியூசிலாந்து அணி வரலாற்றுச் சாதனை படைத்தது.
இந்த நிலையில் இவ்விரு அணிகளுக்கு இடையிலான டி20 தொடர் நடைபெற்று வருகிறது. இதில், முதல் இரண்டு போட்டியில் வெற்றிபெற்ற இந்திய அணி 2-0 என முன்னிலை பெற்றுள்ளது.
இந்நிலையில் இரண்டு அணிகளுக்கும் இடையேயான மூன்றாவது டி20 போட்டி கவுகாத்தியில் நடந்துவருகிறது.
0 ரன்னில் வெளியேறிய சஞ்சு சாம்சன்..
பரபரப்பாக தொடங்கப்பட்ட போட்டியில் டாஸ் வென்ற இந்திய அணி பந்துவீச்சை தேர்வுசெய்தது. அதன்படி முதலில் பேட்டிங் செய்த நியூசிலாந்து அணி 20 ஓவரில் 153 ரன்கள் சேர்த்தது. சிறப்பாக பந்துவீசிய பும்ரா 3 விக்கெட்டுகளை வீழ்த்தி அசத்தினார்.
154 ரன்கள் அடித்தால் வெற்றி என விளையாடிய இந்திய அணியில், தொடக்க வீரராக களமிறங்கிய சஞ்சு சாம்சன் முதல் பந்திலேயே பவுல்டாகி 0 ரன்னில் நடையை கட்டினார். முதலிரண்டு போட்டிகளில் 10, 6 என வெளியேறிய சஞ்சு சாம்சன், இந்த போட்டியிலாவது கம்பேக் கொடுப்பார் என்று நினைத்தபோது மீண்டும் டக் அவுட்டாகி வெளியேறி ஏமாற்றினார்.
சுப்மன் கில் சரியாக விளையாடவில்லை என வெளியேற்றப்பட்டு சாம்சனுக்கு வாய்ப்பு வழங்கினால், இவரும் மோசமாக செயல்படுவது ரசிகர்களிடையே அதிருப்தியை ஏற்படுத்தியுள்ளது.
