தனுஷ் நடிப்பில் உருவாகியுள்ள 'ஓம்' படத்தின் இசை வெளியீட்டு விழாவில் கூட்ட நெரிசல் ஏற்பட்டது. பல ரசிகர்கள் நுழைவுச்சீட்டுடன் வந்தும் நிகழ்வில் கலந்துகொள்ள முடியாததால், தனுஷ் தனது வருத்தத்தை எக்ஸ் தளத்தில் பகிர்ந்து, தவறுக்கு தானே பொறுப்பேற்றார்.
ராஜ்குமார் பெரியசாமி இயக்கித்தில் நடிகர் தனுஷ் நடிப்பில் உருவாகியிருக்கும் ஆக்ஷன் திரில்லர் திரைப்படம் ’ஓம்’. இப்படத்தில் தனுஷ் உடன் மம்மூட்டி, சாய் பல்லவி, ஸ்ரீலீலா என பெரிய திரை நட்சத்திரங்களும் நடித்திருக்கின்றனர். கடந்த மாதமே வெளியாகும் எனத் திட்டமிடப்பட்டிருந்த இத்திரைப்படம், ஒத்திவைக்கப்பட்டு நவம்பர் 20-ஆம் தேதி வெளியாகும் என அறிவிக்கப்பட்டது.
இந்நிலையில் தீபாவளியையொட்டி வெளியாகவிருக்கும் இப்படத்தின் வெளியீட்டிற்கு முன்னதாக, படக்குழுவினர் ஒரு பிரம்மாண்டமான வெளியீட்டிற்கு முந்தைய நிகழ்ச்சியை நடத்தினர். அதன்படி நவம்பர் 6-ஆம் தேதியான நேற்று, சென்னையில் உள்ள தனியார் பொறியியல் கல்லூரியில் 'ஓம்' படத்தின் இசை வெளியீட்டு விழா நடைபெற்றது. தனுஷைத் தவிர, மம்மூட்டி, சாய் பல்லவி உள்ளிட்ட 'ஓம்' படக்குழுவின் மற்ற முக்கிய உறுப்பினர்களும் இந்த நிகழ்வில் கலந்துகொண்டனர்.
இந்தசூழலில் தான் இந்நிகழ்ச்சியில் பங்கேற்பதற்குண்டான நுழைவுச்சீட்டுகள் பல ரசிகர்களிடம் இருந்தபோதிலும், அவர்களால் இந்த நிகழ்வில் கலந்துகொள்ள முடியவில்லை. இந்தகுளறுபடியில் நிகழ்ச்சி நடைபெறும் இடத்தில் ஆயிரக்கணக்கில் ரசிகர்கள் கூடியதால் கூட்டநெரிசல் ஏற்பட்டது. இதற்கு பல்வேறு தரப்பிடமிருந்து விமர்சனங்கள் வந்த நிலையில், நடந்த தவறுக்கு தானே பொறுப்பேற்பதாக நடிகர் தனுஷ் வருத்தம் தெரிவித்துள்ளார்.
இதுகுறித்து எக்ஸ் தளத்தில் பதிவிட்டிருக்கும் அவர், “ஆயிரக்கணக்கான ரசிகர்கள் கைகளில் நுழைவுச்சீட்டு வைத்திருந்தும் உள்ளே வரமுடியாமல் திரும்பச் சென்றது என் மனதிற்கு மிகவும் வேதனை அளிக்கிறது. இது யாருடைய தவறு? என்று நான் ஆராய விரும்பவில்லை… நானே இதற்குப் பொறுப்பேற்று என் வருத்தங்களை தெரிவித்துக் கொள்கிறேன். இனி இப்படி நடக்காமல் பார்த்துக் கொள்வது என் பொறுப்பு” என கூறியுள்ளார்.