விண்வெளிக் குப்பையால் தாக்கப்பட்ட விண்கலம்: சீன வீரர்களின் பூமி திரும்புவதில் தாமதம்!

சீனாவின் டியாங்காங் விண்வெளி நிலையத்தில் இருந்த மூன்று விண்வெளி வீரர்களின் பூமி திரும்புதல், அவர்களின் விண்கலம் ஒரு சிறிய விண்வெளிக் குப்பையால் தாக்கப்பட்டிருக்கலாம் என்ற சந்தேகத்தின் பேரில் காலவரையின்றித் தாமதப்படுத்தப்பட்டுள்ளது. ஷென்சோ-20 குழு விண்வெளி வீரர்களை பூமிக்குத் திரும்பக் கொண்டுவரவிருந்த விண்கலத்தின் மீது சிறிய சுற்றுப்பாதை குப்பை மோதியிருக்கலாம் என்று சீனா ஆட்களுடன் கூடிய விண்வெளி நிறுவனம் சந்தேகம் தெரிவித்துள்ளது.

ஷென்சோ-20 குழுவினர் ஆறு மாதப் பயணத்தை முடித்து, இன்று திரும்புவார்கள் என்று எதிர்பார்க்கப்பட்டது. ஆனால், விண்கலத்தின் தாக்கம் மற்றும் அதனுடன் தொடர்புடைய அபாயங்களை மதிப்பிடும் பணி நடைபெற்று வருவதால், அவர்களது பயணம் தள்ளி வைக்கப்பட்டுள்ளது.ஷென்சோ-20 குழு ஏப்ரல் மாதம் டியாங்காங் விண்வெளி நிலையத்துக்குப் பயணித்தது. அவர்களுக்குப் பதிலாகப் புதிய குழுவான ஷென்சோ-21 குழு விண்வெளி நிலையத்துக்கு வந்து சேர்ந்த பின்னரே இந்தக் குழு திரும்புவதாக இருந்தது.

தற்போது விண்வெளி நிலையத்தில் ஆறு வீரர்கள் உள்ளனர்.விண்வெளி வீரர்களின் ஆரோக்கியம் மற்றும் பாதுகாப்பு உறுதி செய்யப்படுவதற்கு அபாய மதிப்பீடு செய்யப்படுகிறது.விண்கலம் திரும்புவது அதிக ஆபத்து என மதிப்பிடப்பட்டால், அதிகாரிகள் மாற்றுத் திட்டம் ('Plan B') ஒன்றைச் செயல்படுத்தலாம். இதில் பூமிக்கு வெளியே தயார் நிலையில் வைக்கப்பட்டுள்ள காப்புப் பிரதி விண்கலத்தை அனுப்புவதற்கான சாத்தியக்கூறுகள் உள்ளன. "ஷென்சோ-22 மற்றும் லாங் மார்ச் 2எஃப் (ஏவூர்தி) ஏற்கனவே தயார் நிலையில் உள்ளன.

இதுவே எங்களின் தொடர்ச்சியான காப்புப் பிரதி பொறிமுறையாகும். அவை தேவைப்பட்டால் எங்கள் விண்வெளி வீரர்களைப் பாதுகாப்பாக வீட்டிற்கு அழைத்து வர 'அவசர கடமை' முறையில் தயாராக உள்ளன," என்று விண்வெளித் தொடர்பாளர் ஒருவர் தெரிவித்துள்ளார். ஷென்சோ-20 குழுவின் தளபதி சென் டோங், 380 நாட்களுக்கும் மேலாக விண்வெளியில் செலவழித்ததன் மூலம் சீன விண்வெளிப் பயணத்தில் அதிக காலம் விண்வெளியில் இருந்தவர் என்ற சாதனையைப் படைத்தவர் என்பது குறிப்பிடத்தக்கது.