உக்ரைனுக்கு மீண்டும் சாட்டிலைட் சேவை! மஸ்க் முடிவின் பின்னணி என்ன?

ஸ்பேஸ் எக்ஸ் (space x) நிறுவனத்தின் ஸ்டார்ஷீல்ட் செயற்கைக்கோள் தகவல் தொடர்பு சேவை உக்ரைனில் மீண்டும் செயல்படத் தொடங்கியுள்ளதாகத் தகவல்கள் வெளியாகியுள்ளன. இந்தச் சேவையில் விதிக்கப்பட்ட கட்டுப்பாடுகளால் உக்ரைன் ராணுவத்தின் ட்ரோன் தாக்குதல்கள் பாதிக்கப்பட்டதாகக் கூறப்படுகிறது.

உக்ரைன் ராணுவம் ட்ரோன்களைத் தொலைவிலிருந்து இயக்கவும், அவற்றின் செயல்பாடுகளைக் கண்காணிக்கவும் செயற்கைக்கோள் தகவல் தொடர்பு உதவுகிறது. இந்நிலையில், ஸ்டார்ஷீல்ட் சேவையில் ஏற்பட்ட கட்டுப்பாடுகளால் சில ட்ரோன்களின் தொடர்பு துண்டிக்கப்பட்டதாகவும், இதனால் ராணுவ நடவடிக்கைகளில் சிக்கல் ஏற்பட்டதாகவும் தகவல்கள் தெரிவிக்கின்றன.

இந்தக் கட்டுப்பாடுகள் ஏன் விதிக்கப்பட்டன என்பது குறித்து குழப்பம் நிலவுகிறது. இது தொடர்பாக ஸ்பேஸ் எக்ஸ் நிறுவனத்தின் தலைவர் எலான் மஸ்க் கூறுகையில், ஸ்டார்ஷீல்ட் அமெரிக்க அரசின் பாதுகாப்புத் தேவைகளுக்காகச் செயல்படும் அமைப்பு என்பதால், அதன் பயன்பாட்டு விதிகளை அமெரிக்கப் பாதுகாப்புத் துறையான பென்டகன்தான் தீர்மானிக்கிறது எனத் தெரிவித்துள்ளார்.

ஆனால், இந்தக் கட்டுப்பாடுகளைத் தாங்கள் விதிக்கவில்லை என்று வெள்ளை மாளிகை அதிகாரிகள் மறுத்துள்ளதாகக் கூறப்படுகிறது. இதனால், இந்தப் பிரச்சினைக்குப் பின்னால் இருப்பது யார் என்ற கேள்வி எழுந்துள்ளது.

இந்தச் சூழலில், செயற்கைக்கோள் சேவையை மட்டுமே நம்பியிருக்காமல், ட்ரோன்களை இயக்குவதற்கான மாற்றுத் தகவல் தொடர்பு வழிகளையும் உக்ரைன் ராணுவம் ஆராய்ந்து வருகிறது.