பிரிட்டனுக்குக் குறி..? தாக்குதல் நடத்தத் திட்டம்..? விரிவடையும் ஈரான் போர்?

செய்தியாளர் - M. மீரா

இங்கிலாந்தின் தென்மேற்குப் பகுதியில் உள்ள RAF Fairford விமானப்படைத் தளத்திற்கு அருகே, பயங்கரவாதத் தாக்குதல் நடத்தத் தயாராக இருந்தனர் என்ற சந்தேகத்தின்பேரில் 5 பேர் கைது செய்யப்பட்டுள்ள சம்பவம் பெரும் பரபரப்பை ஏற்படுத்தியுள்ளது. அமெரிக்க விமானப்படை பயன்படுத்தி வரும் RAF Fairford தளம், ஈரானுக்கு எதிரான அமெரிக்க நடவடிக்கைகளுடன் தொடர்புடையதாக இருப்பதால், இந்தச் சம்பவத்தின் பின்னணியில் ஈரான் உள்ளதா என்ற கேள்வியும் எழுந்துள்ளது. அதே நேரத்தில், ரஷ்யா அல்லது இஸ்லாமிய தீவிரவாதக் குழுக்களின் தொடர்பு ஏதேனும் இருக்கிறதா என்ற கோணத்திலும் விசாரணை நடைபெற்று வருவதாக தகவல்கள் வெளியாகியுள்ளன.

RAF Fairford-இல் என்ன நடந்தது?

செப்டம்பர் 27 அதிகாலை சுமார் 12.45 மணியளவில், RAF Fairford நோக்கி மூன்று சந்தேகத்திற்கிடமான வாகனங்கள் செல்வதாக அதிகாரிகளுக்கு தகவல் கிடைத்தது. இதையடுத்து காவல்துறையினர் Whelford என்ற கிராமத்திற்கு அருகே 5 பேரைக் கைது செய்தனர்.

இந்தப் பகுதி விமானப்படைத் தளத்திலிருந்து சுமார் 3.2 கிலோமீட்டர் தொலைவில் உள்ளது. கைது நடவடிக்கையைத் தொடர்ந்து, அருகில் வசித்த மக்களை முன்னெச்சரிக்கை நடவடிக்கையாக வீடுகளில் இருந்து வெளியேற்றினர். வெடிகுண்டு செயலிழப்பு நிபுணர்கள் மற்றும் ராணுவப் பிரிவுகளும் சம்பவ இடத்திற்கு வரவழைக்கப்பட்டனர்.

கைது செய்யப்பட்டவர்கள் பயங்கரவாதச் செயல் மற்றும் வெடிபொருள் தொடர்பான குற்றங்களுக்குத் தயாராகியிருந்ததாக அதிகாரிகள் தெரிவித்துள்ளனர். ஆனால், அவர்கள் என்ன தாக்குதலை நடத்தத் திட்டமிட்டனர் என்பது இதுவரை அதிகாரப்பூர்வமாக வெளியிடப்படவில்லை.

அப்பகுதியில் இருந்த ஒரு பெண் விவசாயி, கைவிடப்பட்ட நிலையில் மூன்று வெள்ளை நிற வேன்கள் இருப்பதை கவனித்து அதிகாரிகளுக்கு தகவல் கொடுத்ததாக கூறப்படுகிறது. அந்தப் பெண், முகத்தை மறைத்திருந்த சிலர் மரங்கள் மற்றும் வயல்வெளிகளை நோக்கி ஓடியதாகவும் தெரிவித்தார். இதையடுத்து அவர் காவல்துறையைத் தொடர்புகொண்டு, உள்ளூர் WhatsApp குழுவிலும் அப்பகுதி மக்களை எச்சரித்ததாக கூறப்படுகிறது. இதன் பின்னர் 25 நிமிடங்களுக்குள் 5 பேர் கைது செய்யப்பட்டதாக தகவல்கள் தெரிவிக்கின்றன.

Cotswolds பகுதியில் அமைந்துள்ள RAF Fairford, பல தசாப்தங்களாக அமெரிக்க விமானப்படையுடன் தொடர்புடைய தளமாக இருந்து வருகிறது. 1950களிலிருந்து அமெரிக்கா இந்த தளத்தைப் பயன்படுத்தி வருகிறது.

Gulf War, 2003 Iraq War உள்ளிட்ட பல்வேறு ராணுவ நடவடிக்கைகளில் இந்தத் தளம் பயன்படுத்தப்பட்டுள்ளது. சமீபத்திய ஈரான் மோதலின்போதும் அமெரிக்காவின் B-1 மற்றும் B-52 குண்டுவீச்சு விமானங்கள் Fairford தளத்திலிருந்து நடவடிக்கைகளில் ஈடுபட்டதாக கூறப்படுகிறது. இதனால், ஈரான் ஆதரவு குழுக்களின் பார்வையில் இந்த தளம் முக்கிய இலக்காக இருக்கலாம் என்ற அச்சமும் நிலவுகிறது.

இதுதான் தற்போது விசாரணையில் முக்கியமான கேள்வியாக உள்ளது. RAF Fairford உள்ளிட்ட பிரிட்டனில் உள்ள அமெரிக்க ராணுவத் தளங்கள், ஈரான் மோதலின் பின்னணியில் சட்டபூர்வமான இலக்குகள் என்று ஈரான் தரப்பில் முன்னர் எச்சரிக்கைகள் வெளியிடப்பட்டிருந்தன. இதனால் கைது செய்யப்பட்டவர்களின் சதிக்கும் ஈரானுக்கும் தொடர்பு உள்ளதா என்பதை பிரிட்டன் பயங்கரவாத எதிர்ப்பு அதிகாரிகள் விசாரித்து வருகின்றனர்.

Reuters வெளியிட்ட தகவலின்படி, ரஷ்யாவின் நாசவேலை நடவடிக்கை அல்லது இஸ்லாமிய தீவிரவாத சதி ஆகியவையும் விசாரணையில் பரிசீலிக்கப்படுகின்றன.

இதனால், RAF Fairford சம்பவத்தின் பின்னணி குறித்து பல்வேறு கோணங்களில் விசாரணை நடைபெற்று வருகிறது. கைது செய்யப்பட்ட 5 பேரின் அடையாளம் மற்றும் அவர்கள் திட்டமிட்டதாகக் கூறப்படும் தாக்குதலின் தன்மை குறித்த அதிகாரப்பூர்வ தகவல்கள் இன்னும் வெளியாகவில்லை. மொத்தத்தில், இந்தச் சம்பவம் பிரிட்டனின் ராணுவத் தளங்களுக்கான பாதுகாப்பு குறித்த கேள்விகளை எழுப்பியுள்ளது.