மதுரை அரவிந்த் கண் மருத்துவமனை குழுமத் தலைவர் காலமானார்..!
டாக்டர் பி. நம்பெருமாள்சாமி மதுரை அரசு ராஜாஜி மருத்துவமனையில் தனது வாழ்க்கையைத் தொடங்கினார். 1967 ஆம் ஆண்டு இந்தியாவின் குறைந்த பார்வை உதவி மருத்துவமனையை நிறுவினார். அமெரிக்காவில் பயிற்சி பெற்ற பிறகு, மதுரை அரசு ராஜாஜி மருத்துவமனையில் விட்ரியஸ் அறுவை சிகிச்சை மையத்தைத் தொடங்கினார். இது இந்தியாவில் முதன்முதலில் ஒரு மருத்துவமனையாகவும், பின்னர் 1979 ஆம் ஆண்டு அரவிந்த் கண் மருத்துவமனையில் ரெடினா விட்ரியஸ் மருத்துவமனையாகவும் இருந்தது.
மேலும் இவர் கிராமப்புறங்களில் தகவல் தொழில்நுட்பம் சார்ந்த பார்வை மையங்களை அமைத்துள்ளார். அதனுடன் அரவிந்த் மெய்நிகர் கண் மருத்துவ அகாடமியையும் நிறுவியுள்ளார். டாக்டர் ஜி. வெங்கடசாமி கண் ஆராய்ச்சி நிறுவனத்தை நிறுவுவதிலும் அவர் முன்னணிப் பங்காற்றியுள்ளார்.
இந்திய அரசின் பத்மஸ்ரீ விருது, அகில இந்திய கண் மருத்துவ சங்கம் மற்றும் தமிழ்நாடு கண் மருத்துவ சங்கத்தின் வாழ்நாள் சாதனையாளர் விருது, அமெரிக்க கண் மருத்துவ அகாடமியின் சாதனையாளர் விருது, இந்திய மருத்துவ கவுன்சிலின் சிறந்த மருத்துவ ஆசிரியர் பிரிவில் டாக்டர் பி.சி. ராய் தேசிய விருது உள்ளிட்ட ஏராளமான விருதுகளையும் பாராட்டுகளையும் அவர் பெற்றுள்ளார். 2010 ஆம் ஆண்டில், டைம் பத்திரிகை அவரை உலகின் மிகவும் செல்வாக்கு மிக்க 100 நபர்களில் ஒருவராக பட்டியலிட்டது என்பது குறிப்பிடத்தக்கது..
இந்நிலையில் கடந்த சில நாட்களாக உடல்நிலை சரியில்லாமல் இருந்த அவர் இன்று காலை சென்னையில் காலமானார். மருத்துவமனையிலிருந்து பெறப்பட்ட தகவலின்படி, டாக்டர்.பி.நம்பெருமாள்சாமியின் உடல் இன்று மதுரைக்குக் கொண்டுவரப்பட்டு, பிற்பகல் 3 மணியளவில் இங்கு வந்து சேரும்.
மேலும் தேனி மாவட்டத்தில் உள்ள அம்பாசமுத்திரத்தில் நாளை (ஜூலை 25) அவரது உடல் தகனம் செய்யப்படும் என்று தகவல் தெரிவிக்கப்பட்டுள்ளது.
மறைந்த நம்பெருமாள்சாமியின் மனைவி நாச்சியார். வெங்கடேஷ் பிரஜ்னா மற்றும் விஷ்ணு பிரசாத் ஆகிய இரண்டு மகன்களும் உள்ளனர். மேலும் இவரது இறப்பு மருத்துவதுறைக்கே பெரிய இழப்பு என மருத்துவர்கள் அனைவரும் தங்களது இரங்கலை பதிவு செய்து வருகின்றனர்.
