”விஜய் முதல்வராவது உறுதி” - தவெகவின் கொள்கை குறித்தும் விளக்கமளித்த செங்கோட்டையன்!

தவெகவில் இணைந்துள்ள முன்னாள் அமைச்சர் செங்கோட்டையன் இன்று, கோவை விமான நிலையத்தை வந்தடைந்தார். அப்போது, நூற்றுக்கணக்கான தவெக தொண்டர்கள் கோவை விமான நிலையத்தில் அவரை வரவேற்றனர். இதையடுத்து, அவர் செய்தியாளர்களை சந்தித்துப் பேசினார். அப்போது, ”மக்கள் சக்தியுடன் இருக்கும் தவெக தலைவர் விஜய், எத்தனை தடைகள் வந்தாலும் அவற்றைக் கடந்து, 2026-இல் முதலமைச்சர் ஆவார். மக்கள் சக்தி அவர் பின் வந்திருக்கிறது; மக்கள் சக்தியை வீழ்த்துவதற்கு யாராலும் முடியாது.

தவெக தலைவர் விஜய் முதல்வராவது உறுதி. ஆண்டுக்கு 500 கோடி ரூபாய் சம்பளத்தை விட்டுவிட்டு தமிழகத்தில் நேர்மையான ஆட்சியை கொண்டுவருவதற்கு விஜய் அரசியலுக்கு வந்துள்ளார். அவரின் கட்சியில் இணைந்துள்ளேன். இவர்களுடன் சேர்ந்து அவரை முதலமைச்சராக்குவதற்கு பணிசெய்வேன்” என தெரிவித்தார்.

தொடர்ந்து, தவெகவின் கொள்கை என்னவென்ற செய்தியாளர்களின் கேள்விக்குப் பதிலளித்த செங்கோட்டையன், “இதே கேள்வியைத்தான் எம்.ஜி.ஆர் கட்சி துவங்கும்போதும் ‘அண்ணாயிஸம் என்றால் என்ன’ என்று பத்திரிக்கையாளர் கேட்டார்கள். அப்போது, ஒழுகாத வீடு; கிழியாத உடை; ஆறாத சோறு இதுதான் அண்ணாயிஸம் என்று கூறினார் எம்.ஜி.ஆர். அதேபோலதான் இன்றும், விஜய் எல்லோருக்கும் வீடு வேண்டும்; எல்லோரும் இருசக்கர வாகனத்தில் பயணிக்க வேண்டும்” என மனிதநேயத்துடன் தெரிவித்துள்ளார்.

தொடர்ந்து, நான் சட்டப்பையில் நேற்று ஜெயலலிதாவின் படம் வைத்திருந்தது சர்ச்சையாகியது. ஆனால் தவெகவில் ஜனநாயகம் இருக்கிறது. யாரும் யாருடைய படத்தையும் வைத்துக் கொள்ளலாம். விஜயை முதல்வராக்குவதற்கு எங்களுடைய பணிகள் அமையும், அதை யாராலும் தடுக்க முடியாது” எனத் தெரிவித்துள்ளார்.

முன்னதாக, உட்கட்சிப் பூசல் காரணமாக முன்னாள் அமைச்சர் செங்கோட்டையன் அதிமுகவின் அடிப்படை உறுப்பினர் உட்பட அனைத்துப் பதவிகளிலிருந்தும் எடப்பாடி பழனிசாமி நீக்கி உத்தரவிட்டிருந்தார். இதையடுத்து, தனது சட்டமன்ற உறுப்பினர் பதவியை ராஜினாமா செய்த அவர் தவெக தலைவர் விஜய் முன்னிலையில், நேற்று தவெகவில் இணைந்தார். இந்நிலையில், அவருக்கு தவெக நிர்வாகக்குழு தலைமை ஒருங்கிணைப்பாளர் பதவி கொடுக்கப்பட்டுள்ளது.