“விஜய் பக்குவப்பட்ட அரசியல்வாதியாக தெரிகிறார்” - K.T. ராஜேந்திர பாலாஜி
செய்தியாளர்: மணிகண்டன்
விருதுநகர் மாவட்டம் சிவகாசி அருகே திருத்தங்கல்லில் நடைபெற்ற எம்ஜிஆர் பிறந்தநாள் விழாவில் கலந்து கொண்ட முன்னாள் அமைச்சர் ராஜேந்திர பாலாஜி, அவரது உருவப் படத்திற்கு மாலை அணிவித்து மரியாதை செலுத்தினார். இதைத் தொடர்ந்து செய்தியாளர்களை சந்தித்த அவர் பேசிய போது, “வள்ளல் என போற்றப்பட்ட எம்ஜிஆரால் தொடக்கப்பட்ட அதிமுக, மக்களுக்கு கொடுக்கின்ற கட்சியாக இருக்கின்றது” என்றார். தொடர்ந்து அவர் பேசியதாவது:
"ஈரோடு கிழக்கு இடைத்தேர்தல் நேர்மையாக நடைபெறாது"
“கடந்த முறை நடந்த ஈரோடு கிழக்கு இடைத்தேர்தலில் நடந்த நிகழ்வுகளின் அடிப்படையில் இந்த முறை தேர்தல் நேர்மையாக நடைபெறாது என நினைக்கிறோம். அதிகார துஷ்பிரயோகத்தால் மக்கள் அலைக்கழிக்கப்படுவர் என்பதால் அதிமுக இந்த இடைத்தேர்தலை புறக்கணிப்பதாக தலைமை அறிவித்துள்ளது. திமுக ஆட்சியின் மீது நம்பகத்தன்மை இல்லாததால் மற்ற கட்சிகளும் தேர்தலை புறக்கணித்துள்ளன.
“அதிமுக ஆட்சி அடித்தட்டு மக்களுக்கான ஆட்சி”
தைப்பொங்கல் கொண்டாட மக்கள் யாரையும் நம்பி இருக்க மாட்டார்கள். அதிமுக ஆட்சியில் ரூ.2,500 ரொக்கத்துடன், பொங்கலுக்குத் தேவையான அனைத்து பொருட்களும் வழங்கப்பட்டது. அப்போது பொங்கலுக்கு ரூ.5 ஆயிரம் வழங்க வேண்டும் என கூறிய ஸ்டாலின், தற்போது ஒரு ரூபாய் கூட வழங்கவில்லை. அதிமுக ஆட்சி அடித்தட்டு மக்களுக்கான ஆட்சி, திமுக ஆட்சி அவர்களின் குடும்பத்திற்கான ஆட்சி.
"நீட் தேர்வை ரத்து செய்வோம் எனக் கூறி ஆட்சிக்கு வந்த திமுக"
திமுக ஆட்சிக்கு வந்ததும் முதல் கையெழுத்தில் நீட் தேர்வை ரத்து செய்வோம் எனக் கூறி ஆட்சிக்கு வந்துவிட்டு, தற்போது இந்தியா கூட்டணி ஆட்சிக்கு வந்தால் நீட் தேர்வு ரத்து செய்யப்படும் எனக் கூறுவது ஏமாற்று வேலை. தமிழ்நாட்டில் உள்ள எந்த தரப்பு மக்களையும் பாதிக்காத வகையில் வலுவான கூட்டணி அமைத்து அதிமுக வரும் சட்டப்பேரவைத் தேர்தலில் வெற்றி பெற்று ஆட்சியமைக்கும்.
“விஜயின் நிதானத்தை பார்க்கின்ற போது, பக்குவப்பட்ட அரசியல்வாதியாக தெரிகின்றார்”
திமுக கூட்டணியில் உள்ள கம்யூனிஸ்டுகள் மற்றும் விசிக உள்ளிட்ட கட்சிகளே அரசுக்கு எதிரான கருத்துக்களை தெரிவிக்கின்றது. கூட்டணிக்குள்ளேயே திமுகவுக்கு எதிரான அரசியல் இருக்கிறது.
திமுகவின் அடக்குமுறை மற்றும் ஆணவ அரசியலை எதிர்த்து விஜய் கட்சி தொடங்கியுள்ளார். விஜயின் நிதானத்தை பார்க்கின்ற போது, பக்குவப்பட்ட அரசியல்வாதியாக தெரிகின்றார். அரசின் செயல்பாடுகளை நாங்கள் விமர்சித்தால் அரசியலில் என்பார்கள். புதிதாக கட்சி தொடங்கிய விஜய் உள்ளிட்டோரும் திமுகவை விமர்சிப்பது அதிமுகவுக்கு பலம்தான்.
2010 இல் நடந்த பென்னாகரம் இடைத்தேர்தலில் டெபாசிட் இழந்த அதிமுக, 2011ல் நடந்த பொதுத் தேர்தலில் வெற்றி பெற்று ஆட்சியைப் பிடித்தது. அப்போதும் எதிர்க்கட்சிகள் பிரிந்து கிடக்கின்றன என்ற கருத்து நிலவியது. 2011ல் நடந்த வரலாறு 2026-ல் திரும்பும்” என தெரிவித்தார்.
