ஈரோடு | எடப்பாடி பழனிசாமி பரப்புரையில் ஒருவர் மயங்கி விழுந்து உயிரிழப்பு..

கோபிசெட்டிப்பாளையம் தொகுதி நல்லகவுண்டன்பாளையத்தில் அமைந்துள்ள முத்துமஹால் திருமண மண்டபத் திடலில் அதிமுக பொதுச்செயலாளர் எடப்பாடி பழனிசாமி மேற்கொள்ளும் எழுச்சிப்பயணத்தின் ஒரு பகுதியாக சிறப்புப் பொதுக்கூட்டம் இன்று நடைபெற்றது. அந்த பரப்புரை கூட்டத்திற்கு வந்திருந்த ஒருவர் மயங்கி விழுந்து உயிரிழந்த சம்பவம் சோகத்தை ஏற்படுத்தியுள்ளது.

கொண்டையம்பாளையத்தைச் சேர்ந்த அர்ஜூனன் (43) என்பவர் எடப்பாடி பழனிசாமி பங்கேற்ற இன்றைய பரப்புரை கூட்டத்தில் இடையே நின்று கொண்டிருந்தபோது, திடீரென மயங்கி கீழே விழுந்தார். இந்தச் சம்பவம் அப்பகுதியில் ஒருவித சலசலப்பை ஏற்படுத்தியது. உடனடியாக அங்கிருந்தவர்கள் அவரை மீட்டு கோபிசெட்டிபாளையம் அரசு மருத்துவமனைக்குக் கொண்டு சென்றனர்.

எனினும், மருத்துவமனைக்குச் செல்லும் வழியிலேயே அவர் உயிரிழந்து விட்டதாக மருத்துவர்கள் தெரிவித்தனர். பிரசாரக் கூட்டத்தில் நடந்த இந்தத் திடீர் உயிரிழப்பு குறித்துக் கோபிசெட்டிபாளையம் போலீசார் வழக்குப்பதிவு செய்து விசாரணை மேற்கொண்டு வருகின்றனர். அர்ஜுனனின் உயிரிழப்புக்குக் காரணம் என்ன என்பது குறித்து மருத்துவமனை அறிக்கைக்குப் பின்பே தெரியவரும் எனக் கூறப்படுகிறது.

முன்னதாக, கரூரில் கடந்த செப்டம்பர் மாதம் 27ஆம் தேதி தவெக தலைவர் விஜயின் பரப்புரையின்போது ஏற்பட்ட கூட்ட நெரிசலில் சிக்கி 41 பேர் உயிரிழந்தனர் என்பது குறிப்பிடத்தக்கது. இது நாடு முழுவதும் பெரும் சோகத்தையும் அதிர்ச்சியையும் ஏற்படுத்தியிருந்தது.