சட்டமன்ற தேர்தல்கள் | திமுகவின் செயல்பாடு என்ன? தொகுதிகளும் வாக்கு சதவீதமும்.!

1962இல் நடந்த தேர்தலில்தான் முதன்முதலாக அங்கீகாரத்துடன் உதய சூரியன் சின்னத்தில் திமுக போட்டியிட்டது. அத்தேர்தலில் திமுக 27.1% வாக்குகளை பெற்று 50 இடங்களில் வென்றது. 1967இல் 40.69% வாக்குகளை பெற்று 137 இடங்களில் வென்றதுடன் ஆட்சியையும் முதன்முதலாக பிடித்தது. 1971இல் 48.58% வாக்குகள் பெற்ற நிலையில் 184 இடங்களில் வெற்றி கிடைத்தது. தமிழக சட்டமன்றத் தேர்தலில் திமுக வென்ற அதிக தொகுதிகள், அதிக வாக்கு சதவீதம் இந்த தேர்தலில்தான்.

1977இல் 24.89% வாக்குகளும் 48 இடங்களும் கிடைத்தன. இம்முறை திமுக ஆட்சியை அதிமுகவிடம் இழந்தது. 1980இல் 22.1% வாக்குகளுடன் 37 இடங்களில் திமுக வென்றது. 1984இல் 29.34% வாக்குகள் பெற்ற திமுக 24 இடங்களை மட்டுமே வெல்ல முடிந்தது. அதிமுக இரண்டாக பிளந்திருந்த நிலையில் 1989இல் தேர்தல் நடைபெற்றது. அதில், திமுக 33.18% வாக்குகளுடன் 150 இடங்களில் வென்றது. 13 ஆண்டுகளுக்கு பிறகு மீண்டும் அரியணையும் ஏறியது. 1991இல் ராஜிவ் படுகொலைக்கு பின் நடந்த தேர்தலில் திமுக 22.46% வாக்குகளை பெற்று 2 இடங்களில் மட்டுமே வென்றது. சட்டமன்றத் தேர்தலில் திமுகவின் மோசமான செயல்பாடு இதுவே.

1996இல் 173 இடங்களில் அமோக வெற்றிபெற்ற திமுக 42.07% வாக்குகளை கைப்பற்றி ஆட்சியமைத்தது. 2001இல் 31 இடங்களில் மட்டுமே வென்று ஆட்சியை இழந்த திமுக 30.92% வாக்குகளை ஈட்டியிருந்தது. 2006இல் 26.46% வாக்குகளுடன் திமுக 96 இடங்களில் மட்டுமே வென்றிருந்தாலும் கூட்டணி கட்சிகளின் ஆதரவுடன் ஆட்சியமைத்தது. 2011இல் 23 இடங்களில் வென்ற திமுக, ஆட்சியை பறிகொடுத்தது. இம்முறை அதற்கு 22.39% வாக்குகள் கிடைத்தன. 2016இல் 31.64% வாக்குகளுடன் 89 இடங்களில் வென்ற திமுக தொடர்ந்து எதிர்க்கட்சியாகவே நீடித்தது. மு.கருணாநிதி, ஜெயலலிதா ஆகிய ஆளுமைகள் மறைவுக்கு பின் 2021இல் தேர்தல் நடைபெற்றது. இம்முறை133 இடங்களில் வென்று 37.7% வாக்குகளுடன் திமுக10 ஆண்டு இடைவெளிக்கு பின்னர் மீண்டும் ஆட்சியமைத்தது.