திமுக கூட்டணியில் கொங்குநாடு மக்கள் தேசிய கட்சிக்கு ஒரு தொகுதி ஒதுக்கப்பட்டுள்ளது. கடந்த முறை போட்டியிட்ட நாமக்கல் தொகுதியிலேயே, இந்த முறையும் அந்தக் கட்சி போட்டியிடுகிறது. இதற்கான வேட்பாளராக சூரியமூர்த்தி என்பவரை அக்கட்சி அறிவித்துள்ளது. திமுகவின் உதயசூரியன் சின்னத்திலேயே அவர் போட்டியிடுகிறார்.
இந்நிலையில், சூரியமூர்த்தி கடந்த காலங்களில் பேசிய வீடியோ இணையத்தில் வைரலாகியுள்ளது. அதில் அவர் ஆணவக்கொலை குறித்தும், சாதிய ரீதியாக வெறுப்புணர்வுடன் பேசியிருப்பது குறித்தும் அறப்போர் இயக்கம் சுட்டிக்காட்டியுள்ளது.
கூட்டணி கட்சி தலைவர்கள் மட்டுமல்ல, எதிர்க்கட்சி தலைவர்கள் கூட சூரியமூர்த்தியின் பேச்சுக்கு கண்டனம் தெரிவிக்காமல் இருப்பதாக அந்த இயக்கம் கூறியுள்ளது.
சாதி வெறுப்புணர்வை தூண்டும் வகையில், ஆணவக்கொலை ஆதரவாக பேசிய நபர், மக்களவைத் தேர்தலில் வேட்பாளராக அறிவிக்கப்பட்டது குறித்து திமுக தலைமை மறுபரிசீலணை செய்து முடிவெடுக்க வேண்டும் என்றும் அறப்போர் இயக்கம் குறிப்பிட்டுள்ளது.
