'போட்டி இன்னும் முடியவில்லை.. ஆஸ்திரேலியாவை தோற்கடிப்போம்' - வங்கதேச வீரர் நம்பிக்கை

ஆஸ்திரேலியாவிற்கு சுற்றுப்பயணம் செய்திருக்கும் வங்கதேச கிரிக்கெட் அணி 2 போட்டிகள் கொண்ட தொடரில் விளையாடிவருகிறது. டர்வின் மைதானத்தில் நடைபெற்ற முதலாவது டெஸ்ட் போட்டியில் 9 விக்கெட் வித்தியாசத்தில் வெற்றிபெற்ற வங்கதேச அணி, விரைவாகவே ஆஸ்திரேலியா டெஸ்ட் வெற்றிபெற்ற முதல் ஆசிய அணியாக வரலாறு படைத்தது.

இந்தசூழலில் இரண்டாவது போட்டியில் வென்றால் முதல்முறையாக ஆஸ்திரேலியாவை அவர்களின் சொந்தமண்ணில் ஒயிட்வாஷ் செய்யும் முதல் அணியாக வரலாறு படைக்கும் என்பதால், ஆஸ்திரேலியா - வங்கதேச அணிகளுக்கு இடையேயான 2வது டெஸ்ட் போட்டி மீது எதிர்ப்பார்ப்பு அதிகரித்தது.

இந்நிலையில் இரண்டு அணிகளுக்கு இடையேயான 2வது டெஸ்ட் போட்டி இன்று தொடங்கிய நிலையில், முதல் போட்டியில் படுதோல்வி அடைந்த ஆஸ்திரேலியா வங்கதேசத்தை 64 ரன்னுக்குள் சுருட்டி பதிலடி கொடுத்தது. தொடர்ந்து விளையாடிய ஆஸ்திரேலியா அணிக்கு பதிலடி கொடுக்கும் வகையில், அபாரமான பந்துவீச்சை வெளிப்படுத்திய வங்கதேச பவுலர் ஷோரிஃபுல் இஸ்லாம் 6 விக்கெட்டை வீழ்த்தி மிரட்டினார். ஒருகட்டத்தில் 150 ரன்னுக்குள் ஆஸ்திரேலியா ஆல் அவுட்டாகிவிடும் என நினைத்தபோது 42 ரன்கள் அடித்த ஸ்டீவ் ஸ்மித், அரைசதமடித்த காம்ரூன் க்ரீன் இருவரும் அணியை காப்பாற்றினர்.

முதல்நாள் ஆட்டநேர முடிவில் 165 ரன்னுக்கு 8 விக்கெட்டுகளை இழந்து 101 ரன்கள் முன்னிலை பெற்றுள்ளது ஆஸ்திரேலியா அணி.

இந்நிலையில் 2வது டெஸ்ட் போட்டியில் ஆஸ்திரேலியாவே வெற்றியின் பக்கம் இருப்பதாக எதிர்ப்பார்க்கப்படும் நிலையில், நம்பிக்கையை இழக்காத வங்கதேச பவுலர் ஷோரிஃபுல் இஸ்லாம் வங்கதேசம் கம்பேக் கொடுத்து வெற்றிபெறும் என கூறியுள்ளார்.

இதுகுறித்து முதல்நாள் ஆட்டத்திற்கு பின் பேசியிருக்கும் ஷோரிஃபுல் இஸ்லாம், "ஆட்டம் இன்னும் முடியவில்லை. நாங்கள் இன்னும் ஆட்டத்தில் தான் இருக்கிறோம்; இரண்டாவது இன்னிங்ஸை முழுமையாக எங்கள் வசப்படுத்தி வெற்றிபெற முயற்சிப்போம்” என பேசியுள்ளார்.

மேலும் தன்னுடைய பந்துவீச்சு குறித்து பேசியிருக்கும் அவர், “நான் இங்கு டெஸ்ட் கிரிக்கெட் விளையாட வந்தபோது, ​​நிறைய வீடியோக்களைப் பார்த்து, ஒவ்வொரு பேட்ஸ்மேனுக்கும் எப்படிப் பந்து வீசுவது என்று தயாரானேன், தற்போது அதில் வெற்றியும் பெற்றுள்ளேன்” என்று கூறியுள்ளார். கம்மின்ஸின் விக்கெட்டை வீழ்த்தியது ஒரு மிக அருமையான பழிவாங்கும் செயலாக அமைந்தது என்றும் வெளிப்படுத்தியுள்ளார்.