23 வயதில் அதிக டெஸ்ட் சதங்கள்.. முதலிடம் பிடித்த ஜெய்ஸ்வால்!

இந்தியாவிற்கு சுற்றுப்பயணம் செய்திருக்கும் வெஸ்ட் இண்டீஸ் அணி 2 டெஸ்ட் போட்டிகள் கொண்ட தொடரில் விளையாடுகிறது.

அகமதாபாத்தில் நடைபெற்ற முதல் டெஸ்ட் போட்டியில் இந்திய வீரர்கள் கேஎல் ராகுல், துருவ் ஜூரெல், ரவீந்திர ஜடேஜா 3 பேரும் சதமடித்து அசத்தினர். வெஸ்ட் இண்டீஸ் அணியை இன்னிங்ஸ் வித்தியாசத்தில் தோற்கடித்த இந்திய அணி 1-0 என ஆதிக்கம் செலுத்தியது.

இந்நிலையில் இரண்டு அணிகளுக்கும் இடையேயான 2வது டெஸ்ட் போட்டி டெல்லியில் நடைபெற்றுவருகிறது.

வெஸ்ட் இண்டீஸ் அணிக்கு எதிரான 2வது டெஸ்ட் போட்டியில் இந்திய அணி முதலில் பேட்டிங் செய்தது. தொடக்க வீரராக களமிறங்கிய கேஎல் ராகுல் 35 ரன்னில் வெளியேறினாலும், 2வது விக்கெட்டுக்கு ஜோடி சேர்ந்த ஜெய்ஸ்வால் மற்றும் சுதர்சன் கூட்டணி 193 ரன்கள் பார்ட்னர்ஷிப் போட்டு மிரட்டியது.

சதமடிப்பார் என்ற எதிர்ப்பார்ப்பு எழுந்தபோது 87 ரன்னில் அவுட்டான சுதர்சன் ஏமாற்றினார். ஆனால் மறுமுனையில் 19 பவுண்டரிகளுடன் அதிரடியாக விளையாடிவரும் ஜெய்ஸ்வால் 7வது டெஸ்ட் சதத்தை பதிவுசெய்து அசத்தினார். தொடர்ந்து சிறப்பாக விளையாடிவரும் அவர் 150* ரன்களை கடந்து விளையாடிவருகிறார்.

இந்நிலையில் 23 வயதான யஷஸ்வி ஜெய்ஸ்வால் 23 வயதிற்குள் அதிக டெஸ்ட் சதங்கள் அடித்த தொடக்க வீரர்கள் பட்டியலில் முதலிடத்தை பிடித்து அசத்தியுள்ளார். தென்னாப்பிரிக்காவின் கிரேம் ஸ்மித் 50 இன்னிங்ஸ்களில் விளையாடி 7 சதங்கள் அடித்திருந்த நிலையில், 23 வயதில் 48 டெஸ்ட் இன்னிங்ஸ்களில் விளையாடி 7 சதங்கள் அடித்து அசத்தியுள்ளார் ஜெய்ஸ்வால்.